திமுக கூட்டணியில் காங்கிரஸ் கட்சிக்கு எத்தனை தொகுதிகள் ஒதுக்கப்படும் என்பது குறித்து தற்போது விரிவாகக் கருத்து தெரிவிக்க முடியாது என்று கனிமொழி எம்.பி தெரிவித்துள்ளார். காங்கிரஸ் கட்சியுடன் தொகுதிப் பங்கீடு தொடர்பான பேச்சுவார்த்தைகள் சுமூகமாகத் தொடர்ந்து நடைபெற்று வருவதாகவும், தொகுதிகளின் எண்ணிக்கை குறித்து கட்சித் தலைமையால் அமைக்கப்பட்டுள்ள தொகுதிப் பங்கீட்டுக் குழுவினர்தான் இறுதி முடிவெடுத்துப் பேசுவார்கள் என்றும் அவர் விளக்கமளித்தார்.
மேலும், திமுக கூட்டணியில் தற்போதுள்ள கட்சிகளைத் தவிர, வரும் நாட்களில் கூடுதல் கட்சிகள் இணைய வாய்ப்புள்ளதாகவும் அவர் சூசகமாகத் தெரிவித்தார். புதிய கட்சிகள் ஏதேனும் கூட்டணியில் இணைந்தால், அது குறித்த அதிகாரப்பூர்வ அறிவிப்பை திமுக தலைவரும் முதல்வருமான மு.க.ஸ்டாலின் சரியான நேரத்தில் வெளியிடுவார் என்று கனிமொழி கூறினார்.