தமிழ் சினிமாவில் நட்சத்திர இசையமைப்பாளராக வலம் வருபவர் இளையராஜா. இதுவரை தமிழ் உள்ளிட்ட பல மொழிகளில் 1500 க்கும் மேற்பட்ட படங்களுக்கு இளையராஜா இசையமைத்துள்ளார். கடந்த ஆண்டு மார்ச் மாதம் இளையராஜா மேற்கத்திய கிளாசிக்கல் இசை தொகுப்பான வேலியன்ட் சிம்பொனியை லண்டனில் அரங்கேற்றம் செய்தார். சிம்பொனியை அரங்கேற்றம் செய்த முதல் இந்தியர் என்ற சாதனையை இளையராஜா லண்டனில் படைத்தார்.
அடுத்த சிம்பொனியை விரைவில் எழுதப்போவதாக அப்போது இளையராஜா கூறியிருந்தார். அதுகுறித்து தற்போது இளையராஜா தனது எக்ஸ் பக்கத்தில் வெளியிட்டுள்ள பதிவில் கூறியிருப்பதாவது, இந்த மாதம் பிப்ரவரி 3ம் தேதியுடன் இந்த புதிய ஸ்டூடியோவுக்கு வந்து ஐந்து ஆண்டுகள் கடந்து விட்டது. மேலும் எனது இரண்டாவது சிம்பொனியின் எழுத்துப் பணியும் கிட்டத்தட்ட முடிந்துவிட்டது என்று அதில் குறிப்பிட்டுள்ளார். அதனால் இரண்டாவது சிம்பொனியை விரைவில் முடித்து அதையும் அரங்கேற்றம் செய்யும் திட்டத்தில் இளையராஜா இருந்து வருகிறார் என்கிற தகவல் அவரது ரசிகர்களை உற்சாகப்படுத்தியுள்ளது.