தமிழக அரசியலில் ‘என்ஜின்’ குறித்த விவாதம் தற்போது அண்ணாமலை மற்றும் விஜய் இடையேயான வார்த்தைப் போராக உருவெடுத்துள்ளது. தமிழக வெற்றிக் கழகத்தின் மூன்றாம் ஆண்டு தொடக்க விழாவில் பேசிய நடிகர் விஜய், பாஜகவின் ‘டபுள் என்ஜின்’ மற்றும் திமுகவின் ஆட்சியை ‘ஓட்டை என்ஜின்’ என்று கடுமையாக விமர்சித்தார். தவெக தான் வரும் 2026 தேர்தலில் மக்களுக்கு இருக்கும் ஒரே ‘டாப் என்ஜின்’ ஆப்ஷன் என்றும் அவர் அதிரடியாகத் தெரிவித்தார்.
விஜய்யின் இந்த விமர்சனத்திற்கு கோவை செய்தியாளர் சந்திப்பில் பதிலடி கொடுத்த பாஜக மூத்த தலைவர் அண்ணாமலை, விஜய்யிடம் ஒப்பிடுவதற்கு என்ஜினே இல்லை என்று கிண்டலடித்தார். விஜய்யிடம் வண்டி, பெட்ரோல், டீசல் என எதுவும் இல்லை என்றும், கட்சியை இயக்குவதற்கு ஆட்கள் கூட இல்லாத நிலையில் அவர் வெறும் கைதட்டலுக்காகவும் விசிலுக்காகவும் மட்டுமே பேசி வருவதாகவும் அண்ணாமலை விமர்சித்தார்.
மேலும் திமுக மற்றும் காங்கிரஸ் கூட்டணி குறித்துப் பேசிய அண்ணாமலை, அது ஒரு ‘உடைந்த கண்ணாடி’ போன்றது என்று வர்ணித்தார். வரும் 2026 சட்டமன்றத் தேர்தலில் தமிழகத்தில் அதிமுக தலைமையில்தான் தேசிய ஜனநாயகக் கூட்டணி களம் காணும் என்றும், எடப்பாடி பழனிசாமிதான் முதலமைச்சர் வேட்பாளர் என்றும் தனது நிலைப்பாட்டை அவர் மீண்டும் உறுதிப்படுத்தினார். விஜய்யால் 234 தொகுதிகளிலும் வேட்பாளர்களை நிறுத்த முடியுமா என்றும் அவர் கேள்வி எழுப்பினார்.
மக்களுக்காக இதுவரை கட்சிகள் செய்யாத எந்தப் புதிய திட்டத்தையும் விஜய் முன்வைக்கவில்லை என்றும், அவர் வெறும் மேடைப் பேச்சோடு நின்றுவிடுவதாகவும் அண்ணாமலை குற்றம் சாட்டினார். தமிழகத்தில் சட்டம் ஒழுங்கு சீர்கெட்டுள்ள நிலையில், அரசியல் களம் தற்போது ‘என்ஜின்’ அரசியலை மையமாக வைத்து அனல் பறக்கத் தொடங்கியுள்ளது. இது வரும் சட்டப்பேரவை தேர்தலில் புதிய திருப்பங்களை ஏற்படுத்தும் என்று எதிர்பார்க்கப்படுகிறது.