மதுரை வடக்கு சட்டசபைத் தொகுதியை திமுகவிடமிருந்து காங்கிரஸ் கேட்டுப் பெறும் என்று காங்கிரஸ் நாடாளுமன்ற உறுப்பினர் மாணிக்கம் தாகூர் திட்டவட்டமாகத் தெரிவித்துள்ளார். சமீபத்தில் நடைபெற்ற திமுக பொதுக்கூட்டத்தில், காங்கிரஸ் கட்சிக்கு பூத் கமிட்டி கூட அமைக்கத் தெரியவில்லை என்று மதுரை வடக்கு தொகுதி திமுக எம்.எல்.ஏ கோ.தளபதி விமர்சித்திருந்தார். இதற்குப் பதிலடி கொடுக்கும் வகையிலேயே மாணிக்கம் தாகூர் இந்த அதிரடி கருத்தை முன்வைத்துள்ளார்.
இந்த விவகாரம் குறித்து ஏற்கனவே அகில இந்திய காங்கிரஸ் கமிட்டித் தலைவர் மல்லிகார்ஜுன கார்கேவிடம் தான் வலியுறுத்திவிட்டதாக மாணிக்கம் தாகூர் கூறியுள்ளார். காங்கிரஸ் கட்சியை அவமானப்படுத்தும் விதமாகப் பேசுபவர்களிடம் தயவு தாட்சண்யம் காட்ட முடியாது என்றும், கட்சியின் தன்மானம் தங்களுக்கு மிக முக்கியமானது என்றும் அவர் செய்தியாளர்களிடம் தெரிவித்தார். மேலும், “காங்கிரஸ் கட்சிக்காரர்களுக்கு வந்தே மாதரம் சொல்ல மட்டும் தெரியாது, திருப்பி அடிக்கவும் தெரியும்” என்று அவர் ஆவேசமாகப் பேசியுள்ளார்.
தொகுதிப் பங்கீடு தொடர்பாகப் பூதாகரமாகியுள்ள இந்தப் பிரச்சினையில், மதுரை வடக்கு தொகுதியில் காங்கிரஸ் கை சின்னத்திற்கு வாக்களியுங்கள் என்று ஏற்கனவே போஸ்டர்கள் ஒட்டப்பட்டிருந்தது குறிப்பிடத்தக்கது. இது திமுகவினர் இடையே பெரும் கொந்தளிப்பை ஏற்படுத்தியிருந்தது. மாணிக்கம் தாகூர் தனது உறவினரை இந்தத் தொகுதியில் வேட்பாளராக நிறுத்தவே இத்தகைய அழுத்தங்களை உருவாக்கி வருவதாகத் திமுக தரப்பில் குற்றம் சாட்டப்படுகிறது.
தமிழகத்தில் திமுக தலைமையிலான ‘இந்தியா’ கூட்டணியில் தொகுதிப் பங்கீடு பேச்சுவார்த்தைகள் தீவிரமடைந்து வரும் நிலையில், மதுரை வடக்கு தொகுதி குறித்த மாணிக்கம் தாகூரின் இந்தப் பேச்சு அரசியல் வட்டாரத்தில் பெரும் பரபரப்பை ஏற்படுத்தியுள்ளது. காங்கிரஸ் கட்சியின் இந்த பிடிவாதமான நிலைப்பாடு மற்றும் திமுக எம்.எல்.ஏ-வின் விமர்சனம் ஆகியவை கூட்டணிக்குள் ஒருவித சலசலப்பை உருவாக்கியுள்ளன. இது வரும் நாட்களில் தொகுதிப் பங்கீட்டில் எந்த மாதிரியான மாற்றங்களை ஏற்படுத்தும் என்பதைப் பொறுத்திருந்துதான் பார்க்க வேண்டும்.