நாடு முழுவதும் உள்ள ஆதார் சேவை மையங்களில் காலியாக உள்ள 282 சூப்பர்வைசர் மற்றும் ஆபரேட்டர் பணியிடங்களை நிரப்ப மத்திய அரசு அறிவிப்பு வெளியிட்டுள்ளது. இந்தப் பணிகளுக்கு மாதம் 20,000 ரூபாய் ஊதியமாக நிர்ணயிக்கப்பட்டுள்ளது. இதில் தமிழகத்தில் தருமபுரி, நீலகிரி மற்றும் விருதுநகர் ஆகிய மாவட்டங்களில் தலா ஒரு பணியிடம் வீதம் மொத்தம் மூன்று இடங்கள் காலியாக உள்ளன. 18 வயது பூர்த்தியடைந்த, 12-ஆம் வகுப்பு தேர்ச்சி பெற்றவர்கள் அல்லது 10-ஆம் வகுப்புடன் டிப்ளமோ முடித்தவர்கள் இதற்கு விண்ணப்பிக்கத் தகுதியானவர்கள் ஆவர்.
விண்ணப்பிக்க விரும்புவோர் இந்திய தனித்துவ அடையாள ஆணையத்தின் அங்கீகாரம் பெற்ற ஏஜென்சி மூலம் வழங்கப்பட்ட ‘ஆதார் சூப்பர்வைசர் சான்றிதழ்’ பெற்றிருப்பது அவசியமாகும். நேர்காணல் மற்றும் ஆவணங்கள் சரிபார்ப்பு மூலம் தகுதியான நபர்கள் தேர்வு செய்யப்படுவார்கள். தகுதியும் விருப்பமும் உள்ளவர்கள் csc.gov.in என்ற அதிகாரப்பூர்வ இணையதளத்தில் ஆன்லைன் வழியாக விண்ணப்பிக்கலாம். விண்ணப்பிக்கக் கடைசி நாள் ஜனவரி 31 என்பதால், இன்னும் இரண்டு தினங்களே எஞ்சியுள்ள நிலையில் தகுதியுள்ளவர்கள் விரைந்து விண்ணப்பிக்குமாறு கேட்டுக்கொள்ளப்படுகிறார்கள்.