சென்னை மாமல்லபுரத்தில் நடைபெற்ற தமிழக வெற்றிக் கழகத்தின் மாவட்ட செயலாளர்கள் கூட்டத்தில் பேசிய அக்கட்சியின் தலைவர் விஜய், எதிர்வரும் சட்டமன்றத் தேர்தலை ஒரு “ஜனநாயகப் போர்” என்று வர்ணித்தார். ஆளுங்கட்சி மற்றும் ஆண்ட கட்சிகள் தேர்தலை எதிர்கொள்ளும் விதத்தை விமர்சித்த அவர், அவர்களுக்கு ‘பூத்’ என்பது கள்ள ஓட்டு போடும் இடமாக இருக்கலாம் என்றும், ஆனால் தவெக நிர்வாகிகள் விழிப்புடன் செயல்பட வேண்டும் என்றும் அறிவுறுத்தினார். “முழித்துக் கொண்டிருக்கும்போதே கண்ணைத் தோண்டும் அளவிற்கு” எதிரில் உள்ள தீய சக்திகள் வலிமையானவை என்று எச்சரித்த அவர், நிர்வாகிகள் அனைவரும் ஒற்றுமையுடன் களப்பணியாற்ற வேண்டியதன் அவசியத்தை வலியுறுத்தினார்.
தன்னுடைய தொண்டர்களை “முன்னணி களவீரர்கள்” என்று உற்சாகப்படுத்திய விஜய், விமர்சகர்களால் கணிக்க முடியாத தேர்தலாக இது இருந்தாலும், உழைப்பால் வெற்றியைச் சாத்தியப்படுத்த வேண்டும் என்று கேட்டுக்கொண்டார். “இந்த விஜய்யை உங்களுக்குப் பிடிக்கும் என்றால், அதை உங்களின் கடின உழைப்பில் காட்டுங்கள்” என்று உருக்கமாகப் பேசிய அவர், கூட்டணி குறித்து கவலைப்படாமல் தனித்து நின்று வெல்லும் துணிச்சல் தவெக படைக்கு உண்டு என்பதைத் தெளிவுபடுத்தினார். ராணி வேலுநாச்சியாருக்கு உறுதுணையாக இருந்த மருது சகோதரர்களைப் போல, நிர்வாகிகள் அனைவரும் அர்ப்பணிப்புடன் செயல்பட்டால் அடுத்த மூன்று மாதங்களில் வெற்றியை வசப்படுத்தலாம் என்று அவர் நம்பிக்கை தெரிவித்தார்.