தமிழக அரசியல் களம் தற்போது அனல் பறக்கத் தொடங்கியுள்ளது. அடுத்த சில மாதங்களில் சட்டமன்றத் தேர்தல் நடைபெற உள்ள நிலையில், தி.மு.க தலைமையிலான ‘இந்தியா’ கூட்டணி மற்றும் அ.தி.மு.க – பா.ஜ.க இணைந்த ‘என்.டி.ஏ’ கூட்டணிகளுக்கு இடையே நேரடிப் போட்டி உருவாகியுள்ளது. குறிப்பாக, கடந்த நாடாளுமன்றத் தேர்தலில் பிரிந்த அ.தி.மு.க மீண்டும் தேசிய ஜனநாயகக் கூட்டணியில் இணைந்திருப்பதும், எடப்பாடி பழனிசாமி மற்றும் டி.டி.வி. தினகரன் ஆகியோர் ஒரே மேடையில் கைகோர்த்திருப்பதும் அரசியல் வட்டாரத்தில் பெரும் திருப்பமாகப் பார்க்கப்படுகிறது. இவர்களுடன் நாம் தமிழர் கட்சி மற்றும் தமிழக வெற்றிக் கழகம் ஆகியவையும் தனித்துப் போட்டியிடுவதால், தமிழகத்தில் இதுவரை இல்லாத வகையில் ஒரு வலுவான ‘நான்கு முனைப் போட்டி’ நிலவுகிறது.
நேற்று (ஜனவரி 23) மதுராந்தகத்தில் நடைபெற்ற என்.டி.ஏ கூட்டணியின் பிரம்மாண்ட பொதுக்கூட்டம், அக்கூட்டணியின் தேர்தல் பிரச்சாரத்திற்கு ஒரு வலுவான தொடக்கமாக அமைந்தது. பிரதமர் மோடி பங்கேற்ற இந்த நிகழ்வில் கூட்டணிக் கட்சித் தலைவர்கள் அனைவரும் திரண்டிருந்தது தொண்டர்களிடையே உற்சாகத்தை ஏற்படுத்தியுள்ளது. அதே சமயம், ஆளும் தரப்பான ‘இந்தியா’ கூட்டணியில் தொகுதிப் பங்கீடு மற்றும் அடுத்தகட்ட நகர்வுகள் குறித்த அதிகாரப்பூர்வ அறிவிப்புகள் இன்னும் வெளியாகாதது அரசியல் களத்தில் ஒருவித எதிர்பார்ப்பையும், சலசலப்பையும் ஏற்படுத்தியுள்ளது.
இந்த பரபரப்பான சூழலில், தே.மு.தி.க-வின் நிலைப்பாடு குறித்து பெரும் கேள்வி எழுந்துள்ளது. இன்று சென்னையில் செய்தியாளர்களைச் சந்தித்த கட்சியின் பொதுச்செயலாளர் பிரேமலதா விஜயகாந்த், “கூட்டணி குறித்து இப்போதே எதுவும் சொல்ல முடியாது; பிப்ரவரி 3-ஆம் தேதி வரை கட்சியின் சுற்றுப்பயணம் உள்ளது, அதன் பிறகே இறுதி முடிவு எடுக்கப்படும்,” என்று நிதானமாகப் பதிலளித்தார். மேலும், “தே.மு.தி.க-வினர் எனது பிள்ளைகள், அவர்களை எங்கு, யாரிடம் ஒப்படைக்க வேண்டும் என்பது ஒரு தாயாக எனக்குத் தெரியும்” என்று அவர் கூறியிருப்பது, தே.மு.தி.க இன்னும் தனது ‘கிங் மேக்கர்’ இடத்தைத் தக்கவைத்துக் கொள்ள முயல்வதையே காட்டுகிறது.