தமிழகத்தில் உள்ள ரேஷன் கார்டு தாரர்கள் தங்கள் கார்டில் பெயர் சேர்த்தல், நீக்கம், முகவரி மாற்றம் அல்லது செல்போன் எண் திருத்தம் போன்ற பணிகளை மேற்கொள்ள நாளை ஒரு அரிய வாய்ப்பு கிடைத்துள்ளது. வழக்கமாக ஒவ்வொரு மாதமும் இரண்டாம் சனிக்கிழமைகளில் நடத்தப்படும் இந்த மாதாந்திர குறைதீர் முகாம், பொங்கல் விடுமுறை மற்றும் அரசு விடுமுறை நாட்கள் காரணமாகத் தள்ளி வைக்கப்பட்டது. தற்போது, நாளை சனிக்கிழமை தமிழகத்தின் அனைத்து மாவட்டங்களிலும் உள்ள வட்டாட்சியர் அலுவலகங்கள் மற்றும் வட்ட வழங்கல் அலுவலகங்களில் இந்தச் சிறப்பு முகாம்கள் நடைபெறவுள்ளன.
பொதுமக்கள் தங்களின் ரேஷன் கார்டு தொடர்பான புகார்களைத் தெரிவிக்கவும், புதிய கார்டு கோரி விண்ணப்பிக்கவும் இந்த முகாமைப் பயன்படுத்திக் கொள்ளலாம். பெயர் நீக்கம் அல்லது திருத்தம் செய்ய விரும்புவோர் அதற்கான உரிய ஆதார ஆவணங்களுடன் (ஆதார் கார்டு, பிறப்புச் சான்றிதழ் போன்றவை) நேரில் சென்று திருத்தங்களை உடனுக்குடன் செய்துகொள்ளலாம். ஆன்லைன் மூலம் விண்ணப்பித்து நிலுவையில் உள்ள கோரிக்கைகளுக்கும் இந்த முகாமில் தீர்வு காணலாம் எனத் தமிழக அரசு அறிவுறுத்தியுள்ளது.