சென்னை, தியாகராய நகரில் இன்று செய்தியாளர்களைச் சந்தித்த தவெக மாநிலத் துணைச் செயலாளர் ஆதவ் அர்ஜுனாவிடம், 2026 சட்டமன்றத் தேர்தலில் கட்சி தனித்துப் போட்டியிடுமா என்பது குறித்துக் கேள்வி எழுப்பப்பட்டது. அதற்குப் பதிலளித்த அவர், கட்சியின் தலைவர் விஜய் இதுகுறித்து விரைவில் தெளிவான பதிலை அளிப்பார் என்றும், நடைபெறவுள்ள கட்சியின் பொதுக்குழு கூட்டத்தில் இதற்கான அதிகாரப்பூர்வ அறிவிப்பு வெளியாகும் என்றும் தெரிவித்தார்.
தேர்தல் நெருங்கி வரும் வேளையில், தவெக இதுவரை எந்தப் பெரிய கட்சிகளுடனும் அதிகாரப்பூர்வமாகக் கூட்டணி அமைக்கவில்லை. முன்னதாகத் தனது கட்சியின் முதல் மாநாட்டில், “ஆட்சி அதிகாரம் மற்றும் கூட்டணிக்குத் தயார்” என்ற சமிக்ஞையை விஜய் வெளிப்படுத்தியிருந்தார். இருப்பினும், தற்போதைய அரசியல் சூழலில் தவெக தனித்துப் போட்டியிடுமா அல்லது புதிய கூட்டணிகளை உருவாக்குமா என்பது அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளது.