திருப்பூர் மாவட்டம் வீரபாண்டி பகுதியில், கள்ளக்காதலால் வீட்டை விட்டு வெளியேறிய மகளைத் தந்தையே கழுத்தறுத்துக் கொலை செய்த சம்பவம் பெரும் அதிர்ச்சியை ஏற்படுத்தியுள்ளது. மதுரை மாவட்டத்தைச் சேர்ந்த ஆறுமுகம் என்பவரது மகள் சீமியா (22). இவருக்குத் திருமணம் ஆகி 3 வயதில் ஒரு பெண் குழந்தை உள்ளது. பனியன் நிறுவனத்தில் பணியாற்றும் கணவர் பிரவீன் குமாருடன் ஏற்பட்ட கருத்து வேறுபாடு மற்றும் மதுப் பழக்கத்தால் சீமியா அதிருப்தியில் இருந்துள்ளார். இன்ஸ்டாகிராம் மூலம் அறிமுகமான ஒருவருடன், கடந்த 17 நாட்களுக்கு முன்பு சீமியா வீட்டை விட்டு வெளியேறினார். இது குறித்து வீரபாண்டி காவல் நிலையத்தில் புகார் அளிக்கப்பட்டது.
கன்னியாகுமரியில் இருந்த சீமியாவை மீட்ட போலீசார், நேற்று அவரைத் திருப்பூருக்கு அழைத்து வந்து முறைப்படி அவரது பெற்றோரிடம் ஒப்படைத்தனர்.இன்று ஆறுமுகத்தின் மனைவி வெளியே சென்றிருந்த நேரத்தில், வீட்டில் படுத்திருந்த சீமியாவை அவரது தந்தை ஆறுமுகம் கத்தியால் கழுத்தை அறுத்துக் கொலை செய்துள்ளார். கொலை செய்த பின் எங்கும் தப்பிச் செல்லாமல் வீட்டிலேயே அமர்ந்திருந்த ஆறுமுகத்தை, மாநகர துணை ஆணையர் தீபா சத்யன் தலைமையிலான போலீசார் கைது செய்தனர்.