காஞ்சிபுரம் மாவட்டம் உத்திரமேரூர் அருகே உள்ள சாத்தனஞ்சேரி கிராமத்தில், பொங்கல் பண்டிகையை முன்னிட்டு இருளர் பழங்குடியின மக்கள் மேற்கொண்டு வரும் வினோதமான பாம்பு வழிபாடு சமூக வலைதளங்களில் பலரது கவனத்தையும் ஈர்த்துள்ளது. பல தலைமுறைகளாகத் தொடரும் இந்த வழிபாட்டின் ஒரு பகுதியாக, பொங்கலுக்குச் சில நாட்களுக்கு முன்பே வனப்பகுதிக்குச் செல்லும் இருளர் இன மக்கள், நல்ல பாம்புகளை லாவகமாகப் பிடித்து வந்து தங்கள் வீட்டில் ஒரு உறுப்பினராகவே கருதி பராமரிக்கின்றனர். இயற்கைக்கும் மனிதனுக்குமான பிணைப்பை வெளிப்படுத்தும் இந்த வழக்கம் அந்த கிராமத்தின் தனித்துவமான அடையாளமாகப் பார்க்கப்படுகிறது.
இந்த வழிபாட்டின் முக்கிய நிகழ்வாக, பிடித்து வரப்பட்ட பாம்புகளின் தலையில் மஞ்சள் மற்றும் குங்குமம் வைத்து பொட்டு இட்டு, அவற்றை ஊர்வலமாக வீதி வீதியாக எடுத்துச் செல்கின்றனர். “பாம்பு எடுத்து வந்திருக்கிறோம்” என்று இவர்கள் வீட்டு வாசலில் குரல் கொடுத்ததும், அங்கிருக்கும் பெண்கள் மிகுந்த உற்சாகத்துடனும் பக்தியுடனும் கற்பூரத் தட்டுடன் வெளியே ஓடி வருகின்றனர். உயிருள்ள அந்தப் பாம்பிற்குத் தீபாராதனை காட்டி வழிபடும் இவர்கள், இதன் மூலம் தங்கள் குடும்பம் செழிக்கும் என்றும், விவசாயம் தழைப்பதோடு தீய சக்திகள் விலகும் என்றும் மனதார நம்புகின்றனர்.
இந்தச் சடங்கின்போது ஊர் மக்கள் பழங்குடியினருக்கு அரிசி மற்றும் தங்களால் இயன்ற சிறு தொகையை காணிக்கையாக வழங்குகின்றனர். அனைத்து வீடுகளிலும் வழிபாடு முடிந்த பிறகு, அந்தப் பாம்பிற்கு எந்தவிதமான காயமோ அல்லது பாதிப்போ ஏற்படாத வகையில், அது எங்கு பிடிக்கப்பட்டதோ அதே வனப்பகுதியிலேயே கொண்டு போய் பத்திரமாக விடுவிப்பது இந்த வழிபாட்டின் சிறப்பம்சமாகும். வனவிலங்குகளுக்கு மதிப்பளிக்கும் அதே வேளையில், தங்களின் பாரம்பரிய நம்பிக்கையைப் போற்றும் இந்த நிகழ்வு பழங்குடியினரின் வாழ்வியலை உலகுக்கு பறைசாற்றுகிறது.