சென்னையின் பழமையான மற்றும் வரலாற்றுச் சிறப்புமிக்க இடங்களைச் சுற்றுலாப் பயணிகள் எளிதாகக் கண்டு ரசிக்க ‘சென்னை உலா’ என்ற புதிய பேருந்து சேவையை மாநகர போக்குவரத்துக் கழகம் தொடங்கியுள்ளது. சுமார் 50 ஆண்டுகளுக்குப் பிறகு மீண்டும் அந்த பழைய நினைவுகளைத் தூண்டும் வகையில் அறிமுகம் செய்யப்பட்டுள்ள இந்தப் பேருந்துகள், சென்னை சென்ட்ரலில் தொடங்கி மெரினா, விவேகானந்தர் இல்லம், வள்ளுவர் கோட்டம் உள்ளிட்ட 17 முக்கிய இடங்களைச் சுற்றி வருகின்றன.
விடுமுறை நாட்களில் காலை 10 மணி முதல் இரவு 10 மணி வரையிலும், மற்ற நாட்களில் மாலை நேரங்களிலும் அரை மணி நேரத்திற்கு ஒருமுறை இந்தப் பேருந்துகள் இயக்கப்படுகின்றன. இந்தத் திட்டத்தின் சிறப்பம்சமாக, வெறும் 50 ரூபாய் கட்டணத்தில் ஒரு பயணச்சீட்டு வாங்கினால், அந்த நாள் முழுவதும் இந்தப் பேருந்துகளில் எத்தனை முறை வேண்டுமானாலும் ஏறி இறங்கிப் பயணிக்கலாம்.
சுற்றுலாவை ஊக்குவிக்கும் நோக்கில் கொண்டு வரப்பட்டுள்ள இந்தப் பேருந்துக்கான டிக்கெட்டுகளை நேரடியாகவோ அல்லது ‘சென்னை ஒன்’ செயலி வாயிலாகவோ பெற்றுக்கொள்ள வழிவகை செய்யப்பட்டுள்ளது. மெரினா கடற்கரை முதல் எழும்பூர் அருங்காட்சியகம் வரை சென்னையின் பாரம்பரிய அடையாளங்களைப் பட்ஜெட் விலையில் சுற்றிப் பார்க்க இது ஒரு சிறந்த வாய்ப்பாக அமைந்துள்ளது.