தமிழகத்தின் முன்னேற்றம் மற்றும் மாநில வளர்ச்சியைக் கருத்தில் கொண்டு, வரவிருக்கும் 2026 சட்டமன்றத் தேர்தலுக்காக தமிழக வெற்றிக் கழகம் சார்பில் தேர்தல் அறிக்கை தயாரிக்க ஒரு சிறப்பு குழு அமைக்கப்படுவதாக அக்கட்சியின் தலைவர் விஜய் அறிவித்துள்ளார். இந்த அறிவிப்பின்படி, இக்குழுவினர் தமிழகம் முழுவதும் பயணம் செய்து பொதுமக்கள், விவசாயிகள், தொழிலாளர்கள், தொழில் வல்லுநர்கள் மற்றும் மகளிர் அமைப்புகள் உள்ளிட்ட பல்வேறு தரப்பினரின் தேவைகளையும் கருத்துகளையும் நேரடியாகக் கேட்டறிந்து தரவுகளைச் சேகரிக்க உள்ளனர்.
— TVK Vijay (@TVKVijayHQ) January 9, 2026
கல்வியாளர்கள், மருத்துவர்கள், வர்த்தக சபைகள் மற்றும் பல்வேறு சங்கங்களிடமிருந்து பெறப்படும் இந்தத் தரவுகளின் அடிப்படையில், மாநிலத்தை வளர்ச்சிப் பாதையில் கொண்டு செல்லும் வகையிலான தேர்தல் அறிக்கை வடிவமைக்கப்படும் என்று விஜய் குறிப்பிட்டுள்ளார். மேலும், இக்குழுவின் பணிகளுக்குக் கழகத் தொண்டர்கள் அனைவரும் முழு ஒத்துழைப்பும், தேவையான உதவிகளும் வழங்க வேண்டும் என்று அவர் தனது அறிக்கையில் வலியுறுத்தியுள்ளார்.