அதிமுக பொதுச்செயலாளர் எடப்பாடி பழனிசாமியை (EPS), பாமக தலைவர் அன்புமணி ராமதாஸ் இன்று சென்னை பசுமை வழிச்சாலையில் உள்ள அவரது இல்லத்தில் நேரில் சந்தித்துப் பேசினார். 2026 சட்டமன்றத் தேர்தலை எதிர்கொள்வது மற்றும் இரு கட்சிகளுக்கும் இடையிலான தொகுதிப் பங்கீடு குறித்து இந்தச் சந்திப்பில் விரிவாக ஆலோசிக்கப்பட்டதாகத் தெரிகிறது. கடந்த சில வாரங்களாகவே அதிமுக – பாமக கூட்டணி குறித்த எதிர்பார்ப்புகள் நிலவி வந்த நிலையில், இந்த அதிகாரப்பூர்வச் சந்திப்பு தமிழக அரசியலில் முக்கிய திருப்பமாகப் பார்க்கப்படுகிறது.
இன்று மாலை அன்புமணி ராமதாஸ் தலைமையில் பாமகவின் பிரம்மாண்ட பொதுக்கூட்டம் நடைபெற உள்ளது. இந்த நிலையில், எடப்பாடி பழனிசாமியுடனான சந்திப்பிற்குப் பிறகு நடைபெறும் இக்கூட்டத்தில், அதிமுகவுடனான கூட்டணி குறித்து அன்புமணி ராமதாஸ் அதிகாரப்பூர்வ அறிவிப்பை வெளியிட அதிக வாய்ப்புள்ளதாக அக்கட்சி வட்டாரங்கள் தெரிவிக்கின்றன.