தமிழகத்தில் திமுக – காங்கிரஸ் இடையே ‘கூட்டணி ஆட்சி’ குறித்த விவாதம் வலுத்து வரும் நிலையில், இது குறித்து மாணிக்கம் தாகூர் எம்பி தெரிவித்த கருத்திற்கு அக்கட்சியின் மாநிலத் தலைவர் செல்வப்பெருந்தகை விளக்கம் அளித்துள்ளார். ஜனநாயக நாட்டில் ஒவ்வொருவருக்கும் தங்கள் கருத்துக்களைத் தெரிவிக்க முழு உரிமை உள்ளது என்பதை அவர் அங்கீகரித்துள்ளார். மாணிக்கம் தாகூர் தனது தனிப்பட்ட கருத்தையே முன்வைத்துள்ளார்.
இருப்பினும், கருத்துரிமை உள்ளது என்பதற்காகக் கட்சியின் உட்கட்சி விவகாரங்கள் மற்றும் கொள்கை முடிவுகளைப் பொது வெளியில் விவாதிப்பது முறையாகாது என்று அவர் எச்சரித்துள்ளார். மேலும் இந்தியா கூட்டணி வலிமையாக உள்ளது அதை யாராலும் அசைத்து பார்க்க முடியாது என்றும், எங்களுக்கு தேவையானதை கேட்டுப்பெறுவோம் என்றும் கூறியுள்ளார். கூட்டணிக் கட்சிகளுக்கிடையிலான உறவை பாதிக்கும் வகையிலான பேச்சுகளைத் தவிர்த்து, கண்ணியத்துடன் செயல்பட வேண்டும் என்பதையே அவரது அறிக்கை உணர்த்துகிறது.