சிறுபான்மை அந்தஸ்து பெற்ற கல்வி நிறுவனங்களில் பணியாற்றும் ஆசிரியர்களுக்கு, இனி ஆசிரியர் தகுதித் தேர்வு (TET) அவசியமில்லை என்று தமிழக அரசு மிக முக்கியமான அறிவிப்பை வெளியிட்டுள்ளது. நீதிமன்றத் தீர்ப்புகளின் அடிப்படையில் எடுக்கப்பட்டுள்ள இந்த முடிவின்படி, தகுதித் தேர்வில் தேர்ச்சி பெறவில்லை என்ற காரணத்திற்காக எந்தவொரு ஆசிரியரையும் பணியிலிருந்து நீக்கக்கூடாது என்று உத்தரவிடப்பட்டுள்ளது. மேலும், இந்தத் தேர்வு எழுதாத காரணத்தினால் நிறுத்தி வைக்கப்பட்டிருந்த ஊதிய உயர்வு மற்றும் இதர நிதிப் பயன்களையும் உடனடியாக வழங்க பள்ளிக்கல்வித்துறை ஆணையிட்டுள்ளது.
இந்த அதிரடிச் சலுகையானது அரசு உதவி பெறும் மத மற்றும் மொழிவாரி சிறுபான்மைப் பள்ளிகளுக்கு மட்டுமே பொருந்தும் என்பது குறிப்பிடத்தக்கது. தங்களின் பள்ளி முறையான சிறுபான்மை அந்தஸ்து சான்றிதழைப் பெற்றிருப்பதை உறுதி செய்யும் ஆசிரியர்களுக்கு மட்டுமே இந்த விலக்கு அளிக்கப்படும். இந்த உத்தரவின் மூலம் பல ஆண்டுகளாக ஊதிய உயர்வு இன்றி தவித்த ஆயிரக்கணக்கான ஆசிரியர்கள் பெரும் நிம்மதி அடைந்துள்ளனர். இனி தகுதித் தேர்வு குறித்த அச்சமின்றி அவர்கள் தங்களின் கற்பித்தல் பணியைத் தொடர வழிவகை செய்யப்பட்டுள்ளது.