திண்டுக்கல் மாவட்டம் வத்தலக்குண்டு அருகே, ஒன்பதாம் வகுப்பு படிக்கும் 16 வயது மாணவன் ஒருவன், சக மாணவியைக் காதலிப்பதாகக் கூறி ஆசை வார்த்தை காட்டியுள்ளான். காதலில் விழுந்த அந்த மாணவியிடமிருந்து தந்திரமாக அவரது கம்மல், மோதிரம் போன்ற நகைகளை அந்த மாணவன் முதலில் வாங்கியுள்ளான்.
பின்னர் மாணவி வேறொரு பள்ளியில் சேர்ந்த பிறகும், “உன் வீட்டில் காதலைச் சொல்லிவிடுவேன்” என்று மிரட்டி அந்த மாணவியின் வீட்டிலிருந்த 15 சவரன் நகைகளையும் எடுத்து வரச் செய்துள்ளான். மாணவியின் பெற்றோர் வீட்டில் நகைகள் காணாமல் போனதைக் கண்டு அதிர்ச்சியடைந்து விசாரித்தபோதுதான், காதலின் பெயரால் நடந்த இந்த மோசடி வெளிச்சத்திற்கு வந்தது.
இது குறித்துப் பெற்றோர் அளித்த புகாரின் பேரில் விசாரணை நடத்திய போலீசார், நகைகளை மிரட்டிப் பறித்த அந்த மாணவனையும், அவனுக்கு உதவியாக இருந்த மற்றொரு நண்பனையும் அதிரடியாகக் கைது செய்தனர்.
கல்வி கற்க வேண்டிய பருவத்தில் மாணவர்கள் இது போன்ற குற்றச் செயல்களில் ஈடுபடுவது அப்பகுதி மக்களிடையே பெரும் கவலையை ஏற்படுத்தியுள்ளது. கைது செய்யப்பட்ட இரு மாணவர்களிடமும் போலீசார் தீவிரமாக விசாரணை நடத்தி வருகின்றனர். பெற்றோர்கள் தங்கள் குழந்தைகளின் நடவடிக்கைகளைக் கண்காணிக்க வேண்டியது அவசியம் என்பதை இந்தச் சம்பவம் உணர்த்துகிறது.