பெங்களூரில் வசித்து வந்த சேலம் மாவட்டத்தைச் சேர்ந்த தம்பதியிடையே ஏற்பட்ட குடும்பத் தகராறு கொலையில் முடிந்துள்ளது. மென்பொருள் பொறியாளரான பாலமுருகன் கடந்த நான்கு ஆண்டுகளாக வேலையின்றி இருந்த நிலையில், அவரது மனைவி புவனேஸ்வரி யூனியன் வங்கியில் உதவி மேலாளராகப் பணிபுரிந்து வந்தார்.
கணவனின் சந்தேகப் புத்தியால் இருவருக்கும் இடையே அடிக்கடி சண்டை ஏற்பட்டுள்ளது. இதனால் மனமுடைந்த புவனேஸ்வரி, தனது இரண்டு குழந்தைகளுடன் கணவரைப் பிரிந்து தனியாக வாழ்ந்து வந்ததோடு, கடந்த வாரம் விவாகரத்து கோரி நீதிமன்ற நோட்டீஸ் அனுப்பியுள்ளார்.
தன்னை விட்டு மனைவி நிரந்தரமாகப் பிரிந்து விடுவார் என்ற கோபத்தில், புவனேஸ்வரி வேலை முடிந்து வீடு திரும்பும் போது பாலமுருகன் அவரை வழிமறித்து நான்கு முறை துப்பாக்கியால் சுட்டுள்ளார். இதில் ரத்த வெள்ளத்தில் சரிந்த புவனேஸ்வரி மருத்துவமனைக்குக் கொண்டு செல்லும் வழியிலேயே பரிதாபமாக உயிரிழந்தார்.
இந்த பயங்கரச் செயலுக்குப் பின் பாலமுருகன் காவல் நிலையத்தில் தானாகவே முன்வந்து சரணடைந்தார். தம்பதியினரின் இந்த மோதலால் அவர்களின் இரண்டு குழந்தைகளின் எதிர்காலம் தற்போது கேள்விக்குறியாகியுள்ளது.