மகாராஷ்டிர மாநிலம் சோலாப்பூரில், தூக்கத்தில் துணியிலேயே மலம் கழித்ததற்காக மூன்று வயது சிறுவன் ஒருவன் கொடூரமாக அடித்துக் கொல்லப்பட்ட சம்பவம் பெரும் அதிர்ச்சியை ஏற்படுத்தியுள்ளது. கர்நாடகாவைச் சேர்ந்த ஷாநாஸ் என்பவர் தனது கணவரைப் பிரிந்து, அக்பர் ரசாக் என்பவருடன் சோலாப்பூரில் வசித்து வந்தார்.
கடந்த டிசம்பர் 11 அன்று மதுபோதையில் இருந்த ரசாக், சிறுவன் உறக்கத்தில் மலம் கழித்ததால் ஆத்திரமடைந்து அவனது கழுத்தை நெரித்துத் தாக்கியதில் அந்தக் குழந்தை பரிதாபமாக உயிரிழந்தது.
வேலை முடிந்து வீடு திரும்பிய தாயிடம் குழந்தை கீழே விழுந்துவிட்டதாக நாடகமாடிய ரசாக், மருத்துவமனைக்குச் செல்லும்போது போலீசிடம் சிக்கிவிடுவோம் என்ற பயத்தில் அவர்களைப் பேருந்து நிலையத்தில் விட்டுவிட்டுத் தப்பியோடினான்.
பின்னர் நடத்தப்பட்ட உடற்கூறாய்வில், குழந்தை கழுத்து நெரிக்கப்பட்டு கொலை செய்யப்பட்டது உறுதியானது. இது குறித்து வழக்குப் பதிவு செய்த சோலாப்பூர் காவல்துறையினர், கர்நாடகாவிற்குத் தப்பிச் சென்ற கொலையாளி ரசாக்கை தீவிரமாகத் தேடிப் பிடித்துக் கைது செய்துள்ளனர்.