சென்னை அம்பத்தூரைச் சேர்ந்த சாந்தி (31), அங்குள்ள ஒரு பெட்ரோல் நிலையத்தில் ஊழியராகப் பணியாற்றி வருகிறார். இவர் பணியில் இருந்தபோது, ஆட்டோவில் வந்திறங்கிய வாலிபர் ஒருவர், “நான் ஆட்டோ சவாரிக்கு ரூ.300 கொடுக்க வேண்டும், கையில் ரொக்கம் இல்லை. நீங்கள் எனக்கு ரூ.300 கொடுத்தால், உங்கள் ஜி-பே எண்ணிற்கு அனுப்பிவிடுகிறேன்” என்று கூறியுள்ளார்.
அதற்குச் சம்மதித்த சாந்தி, தனது ஜி-பே எண் சரியாக வேலை செய்கிறதா என்று பார்க்க, அந்த வாலிபரின் வங்கி கணக்கிற்கு ஒரு ரூபாய் அனுப்பியுள்ளார். அப்போது, சாந்தி தனது ரகசிய குறியீட்டு எண்ணை உள்ளீடு செய்ததை அந்த வாலிபர் கவனித்துள்ளார். பின்னர், “அவசரமாகப் பேச வேண்டும்” என்று கூறி சாந்தியிடமிருந்து அவரது செல்போனை வாங்கியுள்ளார். சிறிது நேரம் பேசிவிட்டு, செல்போனைத் திருப்பித் தந்துவிட்டு அதே ஆட்டோவில் தப்பிச் சென்றார்.
அவர் சென்ற பிறகு செல்போனைச் சரிபார்த்த சாந்திக்கு அதிர்ச்சி காத்திருந்தது. அவரது வங்கி கணக்கிலிருந்து ரூ.14,000 வேறொரு கணக்கிற்கு ஜி-பே மூலம் மாற்றப்பட்டிருந்தது. இதுகுறித்து அவர் அளித்த புகாரின் பேரில், காவல்துறையினர் விசாரணை நடத்தி ‘பரத்’ என்பவரைக் கைது செய்தனர். சாந்தி ஒரு ரூபாய் அனுப்பியபோது அவரது ரகசிய எண்ணைத் தெரிந்துகொண்ட பரத், செல்போனில் பேசுவது போல நடித்து பணத்தைத் திருடியது தெரியவந்தது. அவரிடமிருந்து ரூ.9,000 ரொக்கம் மற்றும் ஒரு ஆட்டோ பறிமுதல் செய்யப்பட்டுள்ளது.