அமெரிக்காவில் வேலை செய்ய விரும்பும் அறிவியல், தொழில்நுட்பம், பொறியியல் மற்றும் கணிதம் ஆகிய பிரிவுகளை சேர்ந்த திறன் வாய்ந்த வெளிநாட்டு பணியாளர்களுக்கு எச் – 1பி விசா வழங்கப்படுகிறது. இந்த விசா திட்டத்தில் அமெரிக்காவில் உள்ள நிறுவனங்கள் திறமையானவர்களை மட்டும் பணிக்கு எடுப்பதில்லை. குறைந்த ஊதியத்தில் பணிபுரிய தயாராக இருப்பவர்களையும் தேர்வு செய்கிறது. இதனால் அமெரிக்கர்களின் வேலைவாய்ப்பு வெளிநாட்டவர்களால் பறிக்கப்படுகிறது என்று கூறி அமெரிக்க அதிபர் டொனால்ட் டிரம்ப் விசா முறையில் பல்வேறு கட்டுப்பாடுகளை கொண்டு வந்தார்.
இந்நிலையில் அமெரிக்க வெளியுறவு அமைச்சகம் விசா தொடர்பான புதிய உத்தரவு ஒன்றை வெளியிட்டுள்ளது. அதன்படி எச்-1பி விசா விண்ணப்பதாரர்கள் மற்றும் அவர்களுடன் அழைத்துச் செல்லும் கணவன் அல்லது மனைவி மற்றும் குழந்தைகளுக்கான எச் 4 விசா விண்ணப்பதாரர்கள் அனைவரும் தங்கள் சமூக வலைதள கணக்குகளை மறைத்து வைக்க கூடாது. தனி உரிமை அமைப்பில் சென்று அவற்றை பொதுக் கணக்காக மாற்ற வேண்டும். அதில் உள்ள பதிவுகள் அனைத்தும் டிசம்பர் 15 முதல் ஆய்வு செய்யப்படும். அமெரிக்க விசா என்பது உரிமை இல்லை. அது ஒரு சலுகை. அமெரிக்காவின் தேசிய பாதுகாப்புக்கு அச்சுறுத்தலாக இருக்கும் விசா விண்ணப்பதாரர்களை அடையாளம் காண ஆய்வில் கிடைக்கும் அனைத்து தகவல்களையும் பயன்படுத்துவோம் என்று அந்த அறிவிப்பில் கூறப்பட்டுள்ளது.