தமிழகத்தில் வருகின்ற அக்டோபர் 20ஆம் தேதி தீபாவளி பண்டிகை கொண்டாடப்பட உள்ள நிலையில் மக்கள் சொந்த ஊர் சென்று திரும்ப ஏதுவாக தொடர்ந்து நான்கு நாட்கள் விடுமுறை அறிவிக்கப்பட்டுள்ளது. தீபாவளிக்கு மறுநாளும் அரசு சார்பில் பொது விடுமுறை அறிவிக்கப்பட்டுள்ளதால் மக்கள் மிகுந்த மகிழ்ச்சியில் சொந்த ஊருக்கு படையெடுத்து வருகிறார்கள்.
இந்நிலையில் தீபாவளி விடுமுறையை முன்னிட்டு தமிழகம் முழுவதும் 1353 அவசர கால 108 ஆம்புலன்ஸ்கள் தயார் நிலையில் இருப்பதாக தமிழக அரசு அறிவித்துள்ளது. பட்டாசு வெடிக்கும் போது விபத்து ஏற்பட்டால் நான்கே நிமிடத்தில் பாதிக்கப்பட்டவர்களை மீட்க மக்கள் நல்வாழ்வுத்துறை ஏற்பாடு செய்துள்ளது. மேலும் பட்டாசு வெடிக்கும் போது பாதுகாப்பான வழிமுறைகளை கடைபிடிக்க வேண்டும் என்றும் அரசு சார்பில் அறிவுறுத்தப்பட்டுள்ளது.