கரூரில் கடந்த செப்டம்பர் 27ஆம் தேதி தமிழக வெற்றி கழகம் தலைவர் விஜய் நடத்திய தேர்தல் பிரச்சார கூட்டத்தில் ஏற்பட்ட நெரிசலில் சிக்கி 41 பேர் பரிதாபமாக உயிரிழந்தனர். இந்த விவகாரம் தமிழக முழுவதும் பெரும் அதிர்வலைகளை ஏற்படுத்தியுள்ளது. இதனைத் தொடர்ந்து ஒரு நபர் விசாரணை ஆணையம் அமைக்கப்பட்டு விசாரணை நடந்து கொண்டிருக்கிறது. அதேசமயம் விஜய்க்கு எதிராக பல ஆவணங்கள் நீதிமன்றத்தில் சமர்ப்பிக்கப்பட்டுள்ளதாகவும் கூறப்படுகிறது. இதனிடையே விஜய் உயிரிழந்தவர்களுக்கு 20 லட்சம் ரூபாய் நிவாரணம் வழங்கப்படும் என அறிவித்திருந்த நிலையில் அதற்கான பணிகள் தற்போது நடந்து கொண்டிருக்கின்றன.
இந்நிலையில் கரூரைச் சுற்றியுள்ள 20க்கும் மேற்பட்ட தமிழக வெற்றிக்கழக மாவட்ட செயலாளர்களிடம் விஜய் தொலைபேசி மூலம் பேசியதாக தகவல் வெளியாகி உள்ளது. கரூரில் பாதிக்கப்பட்ட மக்களை நேரில் சந்திப்பது குறித்த கருத்துக்களை அவர் கேட்டறிந்துள்ளார். மேலும் பிரச்சினைகள் அனைத்தும் சரியாகிவிடும் என நிர்வாகிகளுக்கு நம்பிக்கை அளித்த அவர், பாதிக்கப்பட்ட மக்களுக்கு நேரடியாக உதவவும் சர்ச்சையான பதிவுகளை தவிர்க்கவும் அறிவுறுத்தியுள்ளார்.