தமிழகத்தில் 2026 ஆம் ஆண்டு சட்டமன்ற தேர்தல் நடைபெற உள்ள நிலையில் அனைத்து கட்சிகளும் தீவிரமாக தேர்தல் பணியில் ஈடுபட்டு வருகின்றன. தமிழகத்தில் மீண்டும் எப்படியாவது ஆட்சியைப் பிடித்து விட வேண்டும் என்று திமுக தலைமை ஒரு பக்கம் சிந்தித்து கொண்டு இருக்க மறுப்பக்கம் எடப்பாடி பழனிச்சாமி அதிமுக ஆட்சியை மீண்டும் கொண்டு வருவதற்கான வேலைகளை செய்து வருகின்றார். இவர்களுக்கு இடையே தமிழக வெற்றி கழகம் தலைவர் விஜய் புதிய ஆட்சியை மக்களுக்கு கொடுக்க வேண்டும் என்பதில் உறுதியாக உள்ளார். என்னதான் மற்ற கட்சிகள் போட்டி போட்டுக் கொண்டிருந்தாலும் திமுகவின் கூட்டணி என்பது பலமாக உள்ளது. அதனால் மீண்டும் திமுக ஆட்சி தான் அமையும் என்ற நம்பிக்கையில் முதல்வர் ஸ்டாலின் உள்ளார்.
இப்படியான நிலையில் பாஜகவுடன் மதிமுக கூட்டணி வைக்க மறைமுகமாக பேச்சுவார்த்தை நடப்பதாக பேச்சு அடிபட்டது. இந்நிலையில் ஸ்டாலினை சந்தித்த பிறகு பேசிய வைகோ, திமுக கூட்டணியில் இருந்து விலகுவதாக வரும் செய்தி முற்றிலும் தவறானது என்று விளக்கமளித்துள்ளார். மேலும் பாஜக மற்றும் அதிமுகவுடன் மதிமுக பேச்சுவார்த்தை நடத்துவதாக அபாண்டமாக கூறி வருகிறார்கள். பாஜகவுடன் இம்மி அளவும் தொடர்பு வைக்க மாட்டோம். திமுக கூட்டணியில் தொடர்வோம் என்று வைகோ தெரிவித்துள்ளார்.