சேலத்தில் கணவர் கடனால் தற்கொலை செய்து கொண்டதால் வேலையில்லாத மனைவி எடுத்த முடிவு பாராட்டுகளை பெற்றுள்ளது. சேலத்தை சேர்ந்தவர் பிரேமா. இவர் கணவர் 7 மாதங்களுக்கு முன்பாக தற்கொலை செய்து கொண்டார். 31 வயதான பிரேமாவிற்கு ஐந்து, மூன்று மற்றும் இரண்டு வயதுடைய 3 குழந்தைகள் உள்ளனர். தன்னுடைய கணவர் இறந்ததையடுத்து அந்த குழந்தைகளை காப்பாற்ற முடியாமல் தவித்து வந்த அவர் தற்கொலை செய்து கொள்ளலாம் என்று முடிவு எடுத்துள்ளார்.
இதுகுறித்து அவர் கூறுகையில், “என்னுடைய குழந்தைகளுக்கு சாப்பாடு போடுவதற்கு உறவினர்களிடம் உதவி கேட்ட போது அவர்கள் யாரும் செய்யவில்லை. என்னிடம் 50 ரூபாய் தான் இருந்தது. அதைவைத்துக்கொண்டு நான் விஷத்தை வாங்கி குடிக்கலாம் என்று சென்றேன். ஆனால் கடைக்காரர் கொடுக்க மறுத்து விட்டார். அன்று தெருவில் இருந்து ஒரு முடி வாங்கும் நபர் வந்தார். அவர் குரலை கேட்டதும் நான் வீட்டிலிருந்து வெளியே சென்று என் முடியை வெட்டி விட்டேன்.மொட்டையடித்து முடியை ரூ.150 க்கு விற்று, பிள்ளைகளின் பசியை போக்கினேன். இப்போது வேலை செய்து என் குழந்தைகளை வளர்ப்பேன்” என்று கூறியுள்ளார். தற்கொலை செய்ய நினைத்தவரின் தாயுள்ளத்திற்காக விதியும் அதிசயத்தை நடத்தியுள்ளது. தற்போது யாரோ ஒருவர் மூலம் பிரேமாவிற்கு வேலை கிடைக்க, தற்போது பிள்ளைகளுடன் மகிழ்ச்சியாக இருக்கிறார்.