தமிழ் சினிமாவில் தனக்கு முன்னோடி இல்லாத நடிகர்களில் ஒருவர் எம் ஆர் ராதா. தன்னுடைய தனித்துவமான நடிப்பால் ரசிகர்களைக் கவர்ந்தவர். மேடை நாடகத்தில் முடி சூடா மன்னனாக விளங்கியவர். 1930 மற்றும் 40 களிலேயே சில படங்களில் நடித்தாலும், நாடகம் அளவுக்கு அவருக்கு சினிமா பிடிக்கவில்லை. அதனால் நாடகங்களிலேயே கவனம் செலுத்தினார்.
அதன் பிறகு பத்தாண்டுகளுக்குப் பிறகு 1954 ஆம் ஆண்டு ரத்தக் கண்ணீர் திரைப்படத்தின் மூலம் மீண்டும் சினிமாவுக்கு வந்தார். அந்த படம் மிகப்பெரிய வெற்றிப் படமாக அமைந்தது. அதன் பின்னர் அவருக்கு குணச்சித்திர நடிகராக மிகப்பெரிய பெயர் வாங்கிக் கொடுத்த படம் என்றால் அது சிவாஜியோடு அவர் இணைந்து நடித்த ‘பாகப்பிரிவினை’ திரைப்படம்தான். அந்த படத்தில் சிங்கபூரான் என்ற வேடத்தில் கலக்கி இருப்பார் ராதா. ராதாவை நம் படத்தில் போட்டால் அவரே நகைச்சுவை மற்றும் வில்லத்தனம் என இரண்டையும் பார்த்துக்கொள்வார் என அவரை எல்லா படத்திலும் புக் பண்ண ஆரம்பித்தனர்.
எம் ஜி ஆர் மற்றும் சிவாஜி ஆகிய இருவரும் தமிழ் சினிமாவில் இருபெரும் நடிகர்களாக உருவாகி வந்த காலத்தில் கூட அவர்களுக்காக பணிந்து போகாதவர் எம் ஆர் ராதா. இருவரும அவரை மரியாதையோடு “அண்ணே” என்றுதான் அழைப்பார்கள். எம் ஆர் ராதாவுக்கு தமிழ் சினிமாவில் எப்படி முன்னோடி என்று ஒருவர் கிடையாது, ஆனாலும் அவரின் நடிப்புப் பாணியை அவரின் மகன்கள் வாசு, ராதாரவி உள்ளிட்டவர்களும் மணிவண்ணன், விவேக் உள்ளிட்டவர்களும் பிரதியெடுத்தனர்.
#image_title
இதில் மணிவண்ணன்தான் எம் ஆர் ராதாவுக்கு மிகவும் நெருக்கமாக வருகிறார். மற்றவர்களைப் போல ராதாவின் உடல்மொழியை அவர் எடுக்கவில்லை, மாறாக அவர் பேசிய அதிகாரத்தை நக்கல் செய்யும் கருத்தை எடுத்துக் கொண்டு முற்போக்கு கருத்துகளை தன்னுடைய நகைச்சுவைகளில் பேசினார். இதனால் அவரை எம் ஆர் ராதாவின் கலையுலக வாரிசு என்று அழைக்க ஆரம்பித்தனர்.
அதைப் பற்றி பேசிய மணிவண்ணன் “எம் ஆர் ராதாவின் ரத்த வாரிசான ராதாரவியே சினிமாவில் நடித்து வருகிறார். இருந்தாலும் என்னைப் பலரும் எம் ஆர் ராதாவின் கலையுலக வாரிசு என்று சொல்கிறார்கள். அது உண்மையிலேயே எனக்குப் பெருமையான விஷயம்.” எனப் பேசியுள்ளார்.