புரட்சித்தலைவர் எம்ஜிஆரை பொருத்தவரை விலை மதிப்பில்லாத எத்தனையோ பரிசு பொருட்கள் அவரை தேடி வந்துள்ளது. ஆனால் எம்ஜிஆர் கேட்டு வாங்கிய பரிசு பொருள் என்னவென்று உங்களுக்கு தெரியுமா? ஒரு பேனாவை எம்ஜிஆர் விருப்பப்பட்டு கேட்டு பரிசாக வாங்கிக் கொண்டார். ஏவிஎம், மாடர்ன் தியேட்டர்ஸ் ராமசுந்தரம் ஆகியோருக்கு முன்னால் தமிழ் சினிமாவில் பிரபலமான தயாரிப்பாளராக இருந்தவர் திருச்சி சௌந்தர்ராஜன்.
இவர் பிரபல திரைப்பட தயாரிப்பாளர். அவரது திரைப்படத்துறையில் 25 ஆண்டுகள் பணியாற்றிய நபர்களுக்கு திருச்சி சௌந்தரராஜன் விலை உயர்ந்த பேனாவை பரிசாக வழங்கினார். அவரது நிறுவனத்தில் வேலை பார்த்தவர்களில் எம்.நட்டேசனும் ஒருவர். இவர்தான் பின்னாளில் தயாரிப்பாளராகவும் இயக்குனராகவும் உயர்ந்தார். எம்ஜிஆரை வைத்து எம் நட்டேசன் என் கடமை என்ற படத்தை தயாரித்து இயக்கினார்.
இந்த நிலையில் சௌந்தர்ராஜனின் மகள் எம்.நட்டேசனுக்கு பேனாவை கொடுக்க சென்றுள்ளார். அப்போது உடல்நலம் சரியில்லாத எம்.ஜி.ஆரை பார்ப்பதற்காக நட்டேசன் சென்றுள்ளார். அங்கு சென்ற சௌந்தர்ராஜனின் மகள் பட நிறுவனம் தொடங்கப்பட்டு 25 ஆண்டுகள் நிறைவடைந்ததை கொண்டாடும் விதமாக உங்களுக்கு பேனாவை கொடுக்க வந்தேன் என கூறினார். சௌந்தரராஜனின் மகள் அந்த பேனாவை நட்டேசனிடம் கொடுத்துள்ளார்.
அப்போது எம்ஜிஆர் சௌந்தரராஜனின் மகளை பார்த்து எனக்கு பரிசு கிடையாதா என கேட்டார். உடனே அவர் நீங்க எங்க அப்பாகிட்ட வேலை பார்த்து இருக்கிறீர்களா என கேட்டுள்ளார். அதற்கு எம்ஜிஆர் உங்க அப்பா தயாரித்த பைத்தியக்காரன் படத்திலே நான் நடித்திருக்கிறேன் என கூறியுள்ளார். இது குறித்து உடனே அவர் தனது தந்தையிடம் கூறினார். அடுத்த நாளே சௌந்தர்ராஜன் ஒரு புதிய பேனாவை வாங்கி வந்து எம்ஜிஆருக்கு பரிசாக கொடுத்து மகிழ்ந்தார். இந்த தகவலை பிரபல நடிகர் சித்ரா லட்சுமணன் கூறியுள்ளார்.
