தமிழ் சினிமாவில் 40 களில் இருந்து 70 களின் இறுதிவரை தொடர்ச்சியாக படங்கள் எடுத்து இந்தியா முழுவதும் அவற்றை ரிலீஸ் செய்து வெற்றிகொடி நாட்டிய நிறுவனம் ஏவிஎம். அந்த நிறுவனத்தின் நிறுவனர் ஏ வி மெய்யப்ப செட்டியார் இறந்த போது சில ஆண்டுகள் அவர்கள் படம் தயாரிக்காமல் இருந்தனர்.
இந்நிலையில் ஒரு சிறு இடைவெளிக்குப் பிறகு மீண்டும் சினிமா தயாரிப்பில் இறங்கி செகண்ட் இன்னிங்ஸிலும் வெற்றி கண்டது. அப்போது ஏவிஎம் நிறுவனம் முரட்டுக்காளை மற்றும் சகலகலா வல்லவன் ஆகிய படங்கள் ஹிட்டானதை அடுத்து தொடர்ந்து படங்கள் தயாரித்தனர். அப்போது மாஸ் ஹீரோக்களுக்கான படங்கள் மட்டும் இல்லாமல், குடும்ப ரசிகர்களுக்கான குடும்பக் கதை கொண்ட படங்களையும் எடுத்தனர்.
ஏவிஎம் நிறுவனம் சிறிய பட்ஜெட்டில் படம் எடுத்தாலும் அதை பிரம்மாண்டமாக மக்கள் மத்தியில் விளம்பரப் படுத்தி சிறப்பாக மார்க்கெட்டிங் செய்யும் யுக்தியைக் கையாளும் . பல படங்களுக்கு அவர்களின் விளம்பரம் மிகச்சிறப்பாக அமைந்து மக்களை தியேட்டருக்குள் இழுத்துள்ளது.
அப்படி சிவாஜி, ஜெமினி ஆகியோர் நடிப்பில் உருவான பாவமன்னிப்பு படத்துக்கு நூதனமான முறையில் விளம்பரம் செய்து மக்களை ஆச்சர்யப்பட வைத்தனர். 1961 ஆம் ஆண்டு உருவான பாவ மன்னிப்பு திரைப்படத்தை மக்கள் மத்தியில் அதிக பிரபலமாக்க மிகவும் பிரமாண்டமான அதே வேளையில் புதுமையான ஐடியா ஒன்றை கையில் எடுத்துள்ளது ஏவிஎம் நிறுவனம்.
இதற்காக ஜப்பானில் இருந்து ஒரு ராட்சச ஹீலியம் பலூன் ஒன்று வாங்கி வரப்பட்டு, சென்னை சாந்தி தியேட்டர் அருகே உயரத்தில் பறக்க விடப்பட்டிருந்தது. அந்த பலூனின் மீது ஏவிஎம் நிறுவனத்தின் பெயர் இடம்பெற, அதன் வால் போல் நீளமாக பாவமன்னிப்பு என்றும் எழுதப்பட்டிருந்தது. இந்த பலூன் காற்றில் ஆடுவதை மவுண்ட் ரோட் வழியாக சென்ற அனைத்து மக்களும் பார்த்து வாயில் விரல் வைத்துள்ளனர். இதுவே மக்களை திரையரங்குக்கு இழுக்க ஒரு காரணியாகவும் அமைந்துள்ளது. பாவ மன்னிப்பு படத்தின் வெற்றியில் இந்த பலூன் விளம்பரத்துக்கும் ஒரு முக்கியப் பங்குண்டு என சொன்னால் அது மிகையாகாது.