தமிழ் சினிமாவில் முன்னணி நடிகர்களில் ஒருவராக இருப்பவர் தனுஷ். வரும் பொங்கலுக்கு அவர் நடித்த கேப்டன் மில்லர் படம், திரைக்கு வர இருக்கிறது. செல்வராகவன் இயக்கத்தில் துள்ளுவதோ இளமை படம் மூலம் சினிமாவுக்குள் வந்த இவர், இப்போது நடிகர், பாடகர், தயாரிப்பாளர் என இருந்து வருகிறார். சூப்பர் ஸ்டார் ரஜினிகாந்த் மகள் ஐஸ்வர்யாவை திருமணம் செய்த தனுஷ், தற்போதைய சூழலில் இருவரும் பிரிந்து வாழ்கின்றனர். இவர்களுக்கு யாத்ரா, லிங்கா என்ற 2 மகன்கள் உள்ளனர்.
சமீபத்தில் ஒரு நேர்காணலில் தன் மனைவியுடன் பங்கேற்ற தனுஷின் தந்தை கஸ்தூரி ராஜா பல விஷயங்களை மனம் விட்டு பேசினார். அப்போது அவர் கூறியதாவது, யாத்ரா, லிங்கா இருவருமே இரண்டு விதமானவர்கள். யாத்ரா அமைதியாக இருப்பார். லிங்கா கமர்ஷியலாக இருப்பார். யாத்ராவின் நடவடிக்கைகள் தனுஷை போன்றதாகவே இருக்கும். குழந்தைகளை எப்படி வளர்க்க வேண்டும், குழந்தைகளிடம் ஒரு தந்தை எப்படி இருக்க வேண்டும் என்பதை தனுஷிடம் இருந்து கற்றுக்கொள்ளலாம். குழந்தைகள் மீது அவ்வளவு பாசமாக இருப்பார்.
நான் செல்வராகவன், தனுஷ் ஆகியோரிடம் ஒரு தந்தையாக, பிள்ளைகளிடம் நிறைய இடைவெளி விட்டேன். அவர்கள் மீது அதிக பாசம் இருந்தும் அதை வெளிக்காட்டிக் கொள்ளவில்லை. ஆனால், எங்கே சென்றாலும், தன் குழந்தைகளை தனுஷ் அழைத்துச் செல்கிறார். வெளிநாடுகளில் ஷூட்டிங் என்றால் கூட அவர், ஷூட்டிங் ஸ்பாட்களுக்கு தனது மகன்களுடன் செல்கிறார். அப்பா தனுஷ் நடிகர், பெரியப்பா செல்வராகவன் டைரக்டர், தாத்தா நான் டைரக்டர், அவரது தாத்தா ரஜினிகாந்த் நடிகர், அம்மா டைரக்டர் என எல்லோருமே சினிமா, சினிமா என்று இருக்கும்போது தனுஷ் பிள்ளைகளும் சினிமாவில் எதிர்காலத்தில் இருப்பார்கள் என்று கூறி இருக்கிறார் கஸ்தூரிராஜா.