உலகநாயகன் கமல்ஹாசனின் மகள் ஸ்ருதிஹாசன் “தி ஐ” என்ற ஹாலிவுட் திரைப்படத்தில் நடித்து முடித்துள்ளார். இந்த படம் விரைவில் திரைக்கு வரவுள்ளது. ஏற்கனவே நடிகர் தனுஷின் ஹாலிவுட் திரைப்படம் சமீபத்தில் வெளியானது. இந்நிலையில் சுருதிஹாசன் நடித்த “தி ஐ” படம் கிரேக்க சர்வதேச திரைப்பட விழாவில் திரையிடப்பட்டு விருதுகளுக்கு பரிந்துரைக்கப்பட்டு இருக்கிறது.
மேலும் லண்டன் திரைப்பட விழாவிலும் “தி ஐ” திரையிடப்பட உள்ளது. இதனால் சுருதிஹாசன் மிகுந்த மகிழ்ச்சியில் இருக்கிறார். இதுகுறித்து சுருதிஹாசன் கூறியதாவது, நான் நடித்த “தி ஐ” படம் சர்வதேச திரைப்பட விழாக்களில் விருதுகளுக்கு பரிந்துரைக்கப்பட்டிருப்பதை நினைக்கும் போது மகிழ்ச்சியாக இருக்கிறது. எனக்கு அந்த படம் ரொம்ப ஸ்பெஷல். சுற்றுச்சூழல் மாசுவை மையமாக வைத்து அந்த படம் உருவாகியுள்ளது.
அந்த படத்தை ரசிகர்களுக்கு காட்டுவதற்கு மிகவும் ஆர்வமாக இருக்கிறேன் என கூறினார். இந்த படத்தில் தி லாஸ்ட் கிங்டம் புகழ் மார்க் ரவுலி கதாநாயகனாக நடித்துள்ளார். இதனையடுத்து சுருதிஹாசன் பிரபாஸ் இணைந்து நடித்த சலார் படம் வரும் டிசம்பர் மாதம் திரைக்கு வர இருப்பது குறிப்பிடத்தக்கதாகும்.
