வானில் 30,000 அடி உயரத்தில் மரணம்… விமானத்தில் 13 மணிநேரம் சடலத்துடன் பயணம்…. ஹீத்ரோ விமானத்தில் நடந்த நெஞ்சை பதறவைக்கும் சம்பவம்…!

ஹொங்கொங்கில் இருந்து லண்டன் ஹீத்ரோ விமான நிலையம் நோக்கிப் பயணித்த பிரிட்டிஷ் ஏர்வேஸ் விமானத்தில், 60 வயது மதிக்கத்தக்க பெண் ஒருவர் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. விமானம் புறப்பட்ட அடுத்த அரை மணி நேரத்திலேயே இந்த துரதிர்ஷ்டவசமான மரணம் நிகழ்ந்துள்ளது. இதனால் ஆரம்பத்தில் விமானிகள் மத்தியில் குழப்பம் நிலவினாலும், விமானத்தைத் திருப்பாமல் திட்டமிட்டபடி 13.5 மணிநேரப் பயணத்தைத் தொடர அவர்கள் முடிவெடுத்தனர்.

பயணத்தின் போது உயிரிழந்த பெண்ணின் உடல் துணிகளால் சுற்றப்பட்டு, விமானத்தின் பின்புறம் உள்ள சமையலறைப் (Galley) பகுதியில் வைக்கப்பட்டது. இருப்பினும், அந்த அறையின் தரைப்பகுதி வெப்பமடையும் வசதி கொண்டதாக இருந்ததால், நீண்ட நேரப் பயணத்தின் இறுதியில் சடலம் சிதைவடைந்து விமானம் முழுவதும் துர்நாற்றம் வீசத் தொடங்கியுள்ளது. இது சக பயணிகளுக்கு மிகுந்த அசௌகரியத்தையும் முகச்சுளிப்பையும் ஏற்படுத்தியது. லண்டனில் விமானம் தரையிறங்கியதும் காவல்துறையினர் உடலை மீட்டனர்.

இந்தச் சம்பவம் விமானப் பணியாளர்கள் மத்தியில் பெரும் மன உளைச்சலை ஏற்படுத்தியுள்ள நிலையில், அவர்களில் சிலர் பணியிலிருந்து விலகியுள்ளதாகத் தெரிகிறது. இது குறித்துப் பேசிய பிரிட்டிஷ் ஏர்வேஸ் நிறுவனம், முறையான பாதுகாப்பு நடைமுறைகள் அனைத்தும் பின்பற்றப்பட்டதாகத் தெரிவித்ததுடன், உயிரிழந்தவரின் குடும்பத்தினருக்குத் தங்களது ஆழ்ந்த இரங்கலையும், பாதிக்கப்பட்ட ஊழியர்களுக்குத் தேவையான ஆதரவையும் வழங்கி வருவதாகக் குறிப்பிட்டுள்ளது.