பெற்றோர்களே உஷார்: பள்ளிப் பேருந்தில் உங்கள் குழந்தை பாதுகாப்பானதா?… நொய்டா சம்பவம் சொல்லும் கசப்பான உண்மை…!!!

உத்தரப்பிரதேச மாநிலம் நொய்டாவிலுள்ள அமிட்டி சர்வதேச பள்ளியில், பள்ளி நிர்வாகத்தின் அலட்சியத்தால் ஒரு சிறுவன் பள்ளிப் பேருந்திற்குள்ளேயே சுமார் ஆறு மணி நேரம் தனியாக விடப்பட்ட அதிர்ச்சிகரமான சம்பவம் நிகழ்ந்துள்ளது. காலையில் வழக்கம்போல பள்ளிக்குச் சென்ற அந்தச் சிறுவன் பேருந்திலேயே உறங்கிவிட்ட நிலையில், ஊழியர்கள் யாரும் கவனிக்காமல் பேருந்தை சுமார் 25 கிலோமீட்டர் தொலைவிலுள்ள ஒரு வெறிச்சோடிய வாகன நிறுத்தத்தில் நிறுத்திச் சென்றுள்ளனர்.

மேலும் மதிய வேளையில் குழந்தை பள்ளிக்கு வரவில்லை என்பது தெரியவந்த பிறகே தேடுதல் வேட்டை நடத்தப்பட்டு, வியர்வையில் நனைந்து மிகுந்த அச்சத்துடன் இருந்த சிறுவன் மீட்கப்பட்டான். இந்தச் சம்பவம் குறித்து கடும் அதிருப்தி தெரிவித்துள்ள சிறுவனின் தந்தை, தனது மகனின் பாதுகாப்பு மற்றும் எதிர்காலம் குறித்து கவலை வெளியிட்டுள்ளார். பள்ளிப் பேருந்துகளில் மாணவர்கள் அனைவரும் இறங்கிவிட்டனரா என்பதைச் சோதிக்க வேண்டிய அடிப்படை விதிகள் மீறப்பட்டுள்ளது.

இந்நிலையில் வருகைப் பதிவேட்டிலும் குளறுபடிகள் இருந்தது வெளிச்சத்திற்கு வந்துள்ளது. இது தொடர்பாக பள்ளி நிர்வாகம் முறையான விசாரணை நடத்தி, தவறு செய்தவர்கள் மீது கடுமையான நடவடிக்கை எடுக்கப்படும் என்றும், போக்குவரத்து பாதுகாப்பு வழிமுறைகள் மறுஆய்வு செய்யப்படும் என்றும் உறுதியளித்துள்ளது. இருப்பினும், இந்த அலட்சியப் போக்கு பெற்றோர்கள் மத்தியில் பெரும் அச்சத்தையும் ஆத்திரத்தையும் ஏற்படுத்தியுள்ளது.