தமிழ்நாடு சட்டப்பேரவையில் கலை மற்றும் பண்பாட்டுத் துறைக்கான மானியக் கோரிக்கை மீதான விவாதத்தின் போது, அத்துறை அமைச்சர் ராஜ்மோகன் பல்வேறு முக்கிய அறிவிப்புகளை வெளியிட்டுள்ளார். இதன்படி, கலை மற்றும் பண்பாட்டுத் துறை கல்லூரிகளில் பணியாற்றும் தொகுப்பூதிய ஆசிரியர்களின் மாதாந்திர ஊதியம் ரூ.20,000-ல் இருந்து ரூ.25,000 ஆக உயர்த்தப்பட்டுள்ளது.
மேலும், நாட்டுப்புறக் கலைஞர்கள் தங்களுக்குத் தேவையான கலை உபகரணங்கள், இசைக் கருவிகள் மற்றும் ஆடைகளை வாங்குவதற்காக ஆண்டுதோறும் வழங்கப்படும் நிதி உதவித் தொகை ரூ.10,000-ல் இருந்து ரூ.20,000 ஆக இரட்டிப்பாக்கப்பட்டுள்ளது. இவற்றுடன், நலிவடைந்த கலைஞர்களுக்கு மாதம் ரூ.3,000 வழங்கும் திட்டம் மேலும் 1,500 கலைஞர்களுக்கு விரிவுபடுத்தப்படும் என்றும் அறிவிக்கப்பட்டுள்ளதால், கலை உலகினரும் நலிவடைந்த நாட்டுப்புறக் கலைஞர்களும் பெரும் மகிழ்ச்சியும் வரவேற்பும் தெரிவித்துள்ளனர்.