ஒரு சின்ன பிரச்சனைக்கு இப்படியா…? ஹோட்டல் ஓனர் உள்பட 5 பேர் சுட்டு கொலை… வாடகை தகராறில் நடந்த பயங்கரம்… பரபரப்பு சம்பவம்…!!

அஸ்ஸாம் மாநிலம் குவாஹாட்டியில் உள்ள பிரபல ஹோட்டல் ஒன்றில், வாடகை ஒப்பந்தம் தொடர்பான தகராறில் குத்தகைதாரர் ஒருவர் நடத்திய கொடூரத் துப்பாக்கிச் சூட்டில் ஹோட்டல் உரிமையாளர், அவரது மகன் உட்பட 5 பேர் பரிதாபமாக உயிரிழந்த சம்பவம் நாடு முழுவதும் பெரும் அதிர்ச்சியையும் பரபரப்பையும் ஏற்படுத்தியுள்ளது.

குவாஹாட்டி உலூபாரி பகுதியில் அமைந்துள்ள ‘பிலாஸ் இன்’ என்ற ஹோட்டலை, கடந்த 2025 செப்டம்பரில் மாத வாடகையான ரூ.1.8 லட்சத்திற்கு கனகாந்தா கோகோய் என்பவர் 5 ஆண்டுகளுக்குக் குத்தகைக்கு எடுத்துள்ளார். ஹோட்டல் புதுப்பித்தலுக்குப் பிறகு வசதிகள் மற்றும் இடத்தைப் பயன்படுத்துவதில் உரிமையாளருக்கும் குத்தகைதாரருக்கும் இடையே தகராறு ஏற்பட்டு வந்துள்ளது.

இதுகுறித்துச் சமரசம் பேசுவதற்காக அக்டோபர் 26 அன்று ஹோட்டலில் பேச்சுவார்த்தை கூட்டம் ஏற்பாடு செய்யப்பட்டிருந்தது. பேச்சுவார்த்தை தொடங்குவதற்கு முன்பே இருதரப்பினருக்கும் இடையே ஏற்பட்ட வாக்குவாதம் கை கலப்பாக மாறியது. இதில் ஆத்திரமடைந்த குத்தகைதாரர் கனகாந்தா கோகோய், தன்னிடம் இருந்த துப்பாக்கியை எடுத்து அங்கிருந்தவர்கள் மீது சரமாரியாக சுட்டுத் தள்ளியுள்ளார்.

இந்தக் கொடூரத் தாக்குதலில் ஹோட்டல் உரிமையாளர் ஹெலினா பருவா, அவரது மகன் தேவர்ஷி காஷ்யப், மருமகள் ரினிகா, உறவினர் நாராயண் தாஸ் மற்றும் ஹெலினாவின் சகோதரர் பூதேவ் பருவா ஆகிய 5 பேரும் குண்டுபாய்ந்து சம்பவ இடத்திலேயே உயிரிழந்தனர். மேலும் சத்தியேந்திர பாதக் என்பவரின் தோள்பட்டையில் குண்டு பாய்ந்த நிலையில் அவர் உயிருடன் மீட்கப்பட்டு தீவிர சிகிச்சைப் பிரிவில் அனுமதிக்கப்பட்டுள்ளார். இச்சம்பவத்தின் அதிர்ச்சி சிசிடிவி காட்சிகள் வெளியாகி நெட்டிசன்களை மிரள வைத்துள்ள நிலையில், கொடூரக் கொலையாளி கனகாந்தா கோகோயைக் கைது செய்த காவல்துறையினர் இணை ஆணையர் அங்குர் ஜெயின் தலைமையில் தனிப்படை அமைத்து விசாரணை நடத்தி வருகின்றனர்.