“மரக்கட்டை போல மாறிய உடல்..” -22 டிகிரி கடும் குளிரில் உறைந்துபோன 19 வயது இளம்பெண்… மரணத்தின் விளிம்பிலிருந்து மீண்டு வந்த மருத்துவ அதிசயம்…!!

கடந்த 1980 ஆம் ஆண்டு அமெரிக்காவின் மின்னசோட்டா மாநிலத்தில் -22 டிகிரி கொடூர பனிப்பொழிவுக்கு நடுவே, 19 வயதான ஜீன் ஹில்லியார்ட் என்ற இளம்பெண் கார் பழுதானதால் தனது நண்பர் வாலி நெல்சனின் வீட்டிற்கு உதவி கேட்டு நடந்து சென்றுள்ளார். ஆனால் வழியிலேயே நிலைகுலைந்து பனியில் விழுந்து சுயநினைவை இழந்த அவர், சுமார் 6 மணி நேரம் பனியில் உறைந்த நிலையில் கிடந்துள்ளார்.

காலையில் வீட்டின் அருகே சடலம் போலக் கிடந்த ஜீனைப் பார்த்த நண்பர் நெல்சன், அவர் இறந்துவிட்டதாகவே நினைத்துள்ளார். ஆனால் அவரது மூக்கிலிருந்து சிறிய குமிழிகள் வருவதைக் கண்டு அதிர்ச்சியடைந்து, உடனடியாக அவரை மீட்டு மருத்துவமனைக்குக் கொண்டு சென்றுள்ளார். மருத்துவமனையில் பரிசோதித்த மருத்துவர்கள் அவரது உடலின் நிலையைக் கண்டு மிரண்டுபோயினர். அவரது உடல் மரக்கட்டை போல் உறைந்திருந்ததால் செலுத்திய ஊசிகள் அனைத்தும் முறிந்து விழுந்தன, மேலும் தர்மாமீட்டரிலும் வெப்பநிலை காட்டாத அளவுக்கு உடல் குளிர்ந்திருந்தது.

மருத்துவர்கள் நம்பிக்கை இழக்காமல் மின்சார ஹீட்டிங் பேட்களை வைத்துச் படிப்படியாக அவரது உடலைச் சூடாக்கத் தொடங்கினர். சுமார் 3 மணி நேரப் போராட்டத்திற்குப் பிறகு அவரது உடலில் லேசான துடிப்பு காணப்பட்டது. பின்னர் மெதுவாகக் கண் விழித்த அந்தப் பெண், தான் விபத்துக்குள்ளாக்கிய தந்தையின் காரைக் குறித்து கவலைப்படத் தொடங்கினார். ஏதோ தூங்கி எழுந்தது போல் உணர்ந்ததாகக் கூறிய அந்தப் பெண், எவ்வித பெரிய பாதிப்புமின்றி முழுமையாகக் குணமடைந்து வீடு திரும்பியது மருத்துவ உலகையே வியப்பில் ஆழ்த்தியது.