காதலனுடன் சாட்டிங்.. கையும் களவுமாக பிடித்த அண்ணன்… அறைக்குள் சென்ற தங்கை செய்த பகீர் காரியம்கோவில்பட்டி அருகே நடந்த பயங்கரம்…!

தூத்துக்குடி மாவட்டம் கோவில்பட்டி அருகே உள்ள கயத்தார் தாலுகா, தெற்குமயிலோடை அம்மன்கோவில் தெருவைச் சேர்ந்தவர் செல்வம். இவருடைய 19 வயது மகள் அபிசெல்வி, கடந்த மூன்று வருடங்களாக சமூக வலைதளமான இன்ஸ்டாகிராம் மூலம் சேலத்தைச் சேர்ந்த ஹரி பிரசாத் என்ற வாலிபரைத் தீவிரமாகக் காதலித்து வந்துள்ளார். இவர்களது காதல் விவகாரம் கடந்த இரண்டு வருடங்களுக்கு முன்பே பெண்ணின் குடும்பத்தினருக்குத் தெரியவந்த நிலையில், அபிசெல்வியின் அண்ணன் சிவஞானம் மற்றும் பெற்றோர் ஆகியோர் இந்த காதலுக்குக் கடும் எதிர்ப்பு தெரிவித்து, வன்மையாகக் கண்டித்துள்ளனர். வீட்டின் எதிர்ப்பால் மனமுடைந்த அபிசெல்வி, இரண்டு வருடங்களுக்கு முன்பே வீட்டின் மாடியில் இருந்து கீழே குதித்துத் தற்கொலை முயற்சியில் ஈடுபட்டதும் குறிப்பிடத்தக்கது.

குடும்பத்தினர் தடுத்த போதிலும், அபிசெல்வி தொடர்ந்து சேலத்தைச் சேர்ந்த அந்த வாலிபருடன் இன்ஸ்டாகிராம் மூலம் ரகசியமாகத் தொடர்பில் இருந்து வந்துள்ளார். இந்தச் சூழலில், கடந்த ஜூன் 09ஆம் தேதி அவர் இன்ஸ்டாவில் தனது காதலனுடன் தொடர்ந்து பேசி வந்ததை அவரது அண்ணன் சிவஞானம் நேரில் பார்த்துவிட்டு அதிர்ச்சியடைந்துள்ளார். இதனால் அண்ணன்-தங்கை இருவருக்கும் இடையே கடுமையான வாக்குவாதம் ஏற்பட்டுள்ளது. இதில் ஆத்திரமடைந்த சிவஞானம், தங்கை அபிசெல்வியை அடித்துக் கண்டித்ததாகக் கூறப்படுகிறது.

அண்ணன் அடித்ததால் கடும் கோபமும், கடுமையான மன உளைச்சலும் அடைந்த அபிசெல்வி, யாரும் எதிர்பாராத விதமாகத் தனது வீட்டில் இருந்த கெமிக்கல் பொடியைத் தண்ணீரில் கலந்து குடித்துள்ளார். அதுமட்டுமின்றி, விரக்தியின் உச்சத்தில் வீட்டின் அறைக்குள் சென்ற அவர், கதவை தாழிட்டுக் கொண்டு அங்கிருந்த சீலிங் பேனில் தனது சேலையால் தூக்கிட்டுத் தற்கொலை செய்துகொண்டார். விஷம் குடித்ததோடு தூக்கும் போட்டுக் கொண்டதால், அவர் சம்பவ இடத்திலேயே பரிதாபமாக உயிரிழந்தார்.

இச்சம்பவம் குறித்துத் தகவல் அறிந்து சம்பவ இடத்திற்கு விரைந்து வந்த கயத்தார் காவல் துறையினர், அபிசெல்வியின் உடலைக் கைப்பற்றி பிரேதப் பரிசோதனைக்காகத் திருநெல்வேலி அரசு மருத்துவமனைக்கு அனுப்பி வைத்தனர். சமூக வலைதளக் காதலால் அண்ணன் கண்டித்த இளம்பெண் விஷம் குடித்து, தூக்கிட்டுத் தற்கொலை செய்து கொண்ட சம்பவம் அப்பகுதியில் பெரும் சோகத்தையும் பரபரப்பையும் ஏற்படுத்தியுள்ளது. இச்சம்பவம் குறித்து போலீசார் வழக்குப் பதிவு செய்து தீவிர விசாரணை மேற்கொண்டு வருகின்றனர்.