மகாராஷ்டிர மாநிலம் பிவண்டியில் உள்ள ரோஷன் பாக் பகுதியில், ஒரே ஆட்டோ ரிக்ஷாவில் சுமார் 17 பள்ளி குழந்தைகளை ஏற்றிச் சென்ற சம்பவம் பெரும் அதிர்ச்சியை ஏற்படுத்தியுள்ளது. அனுமதிக்கப்பட்ட பயணிகள் கொள்ளளவை விட மிக அதிகமாக சிறுவர்களை அடைத்துச் சென்றது தொடர்பான வீடியோ சமூக வலைதளங்களில் வைரலாகி, மாணவர்களின் பாதுகாப்பு குறித்த தீவிரக் கவலையை வெளிப்படுத்தியுள்ளது. இந்த சம்பவத்தைப் பதிவு செய்த நபர், ஆட்டோ ஓட்டுநரை மறித்து ஆபத்தான முறையில் குழந்தைகளை ஏற்றிச் சென்றதற்காகக் கடுமையாகத் தட்டிக்கேட்டுள்ளார்.
அந்த நபர் ஆட்டோவில் இருந்த குழந்தைகளை கீழே இறங்கி ஓரமாய் நிற்குமாறு கேட்டுக்கொண்டதைத் தொடர்ந்து, சிறிய ஆட்டோவிற்குள்ளிருந்து குழந்தைகள் ஒவ்வொருவராக வரிசையாக வெளியேறும் காட்சிகள், வாகனத்தில் எந்தளவுக்கு அதிகப்படியான நெரிசலுடன் குழந்தைகள் ஏற்றிச் செல்லப்பட்டனர் என்பதை வெளிச்சம்போட்டுக் காட்டுகின்றன. வழக்கமாக தினமும் 15 மாணவர்களை அழைத்துச் செல்வதாகவும், அன்றைய தினம் கூடுதலாக சில குழந்தைகள் வந்ததால் அவர்களையும் ஏற்றிச் சென்றதாகவும் அந்த ஓட்டுநர் கேள்விகளுக்குப் பதிலளித்துள்ளார்.
சமூக வலைதளங்களில் இந்த காணொளி பரவி உள்ளூர் மக்களிடையே கடும் கொந்தளிப்பை ஏற்படுத்தியதைத் தொடர்ந்து, சம்பந்தப்பட்ட ஆட்டோ ஓட்டுநர் மீது உள்ளூர் காவல்துறையினர் முதற்கட்ட நடவடிக்கை எடுத்துள்ளனர். முறையான பள்ளி வாகன வசதிகள் இல்லாதது மற்றும் கட்டணத் தொகையைக் குறைக்க பெற்றோர்கள் தனியார் ஆட்டோக்களை நாடுவது போன்ற சூழல்களே இத்தகைய ஆபத்தான பயணங்களுக்குக் காரணமாக அமைகின்றன. இச்சம்பவம் பள்ளி மாணவர்களுக்கான போக்குவரத்து பாதுகாப்பு விதிகளைக் கடுமையாக நடைமுறைப்படுத்த வேண்டியதன் அவசியத்தை உணர்த்தியுள்ளது.