“1500 கோடி சொத்து.. ஆட்டம் காணும் கோட்டைகள்”… மாமியார் பின்னடைவு.. மருமகன் முன்னிலை… மார்ட்டின் குடும்பத்தில் வெடிக்கிறதா வாரிசுப் போர்..?

தமிழக சட்டமன்றத் தேர்தல் 2026-ன் வாக்கு எண்ணிக்கை விறுவிறுப்பான கட்டத்தை எட்டியுள்ள நிலையில், ஒட்டுமொத்த மாநிலத்தின் கவனமும் லால்குடி மற்றும் வில்லிவாக்கம் தொகுதிகளின் மீது குவிந்துள்ளது. தொழிலதிபர் சாண்டியாகோ மார்ட்டினின் குடும்பத்தைச் சேர்ந்த மாமியார் லீமா ரோஸ் மற்றும் மருமகன் ஆதவ் அர்ஜுனா ஆகிய இரு பெரும் பணக்கார வேட்பாளர்களின் தேர்தல் களம், ஒரு மெகா சீரியல் திருப்பத்தைப் போல மாறியுள்ளது. சுமார் 1,500 கோடி ரூபாய்க்கும் அதிகமான குடும்ப சொத்து மதிப்புடன் களமிறங்கிய இவர்கள் இருவரும், வெவ்வேறு துருவங்களாகப் பிரிந்து நின்றது இந்தத் தேர்தலின் மிகப்பெரிய பேசுபொருளாக அமைந்தது.

திருச்சி லால்குடி தொகுதியில் அதிமுக சார்பில் களம் கண்ட லீமா ரோஸ், சுமார் 1,049 கோடி ரூபாய் சொத்து மதிப்புடன் இந்தத் தேர்தலின் அதிகப்படியான செல்வந்தராகத் திகழ்ந்தார். கல்வி உதவி உள்ளிட்ட சமூகப் பணிகளை முன்வைத்து அவர் தீவிரப் பிரச்சாரம் மேற்கொண்ட போதிலும், ஆரம்பகட்டத் தபால் வாக்கு எண்ணிக்கையிலேயே அவர் பின்னடைவைச் சந்தித்துள்ளது அதிமுக வட்டாரத்தை அதிர்ச்சியில் ஆழ்த்தியுள்ளது. 2006 முதல் திமுகவின் கோட்டையாக விளங்கும் லால்குடியில், “மண்ணின் மைந்தன்” என்ற அஸ்திரத்தை ஏவிய திமுகவின் பாரிவள்ளல் முன்னிலை பெற்றுள்ளதும், லீமா ரோஸ் மீதான அமலாக்கத்துறை வழக்குகள் மற்றும் “வெளி ஊர்க்காரர்” என்ற முத்திரை அவருக்குப் பலவீனமாக மாறியுள்ளதையும் காட்டுகிறது.

மறுபுறம், சென்னை வில்லிவாக்கத்தில் சுமார் 534.9 கோடி ரூபாய் சொத்து மதிப்புடன் நட்சத்திர வேட்பாளராகக் களம் இறங்கிய மருமகன் ஆதவ் அர்ஜுனா, முதல் சுற்றிலேயே அதிரடியாக முன்னிலை பெற்று ஆச்சரியத்தை ஏற்படுத்தியுள்ளார். தமிழக வெற்றிக் கழகத்தின் (தவெக) முக்கிய முகமாகப் பார்க்கப்படும் இவர், ஆளுங்கட்சியின் செல்வாக்கு மற்றும் முன்னாள் எம்பி எஸ்.ஆர்.விஜயகுமாரின் சவால்களைத் தாண்டி முன்னிலை பெற்றுள்ளது அரசியல் நோக்கர்களைத் திரும்பிப் பார்க்க வைத்துள்ளது. துணிச்சலான புகார்கள் மற்றும் வீடு வீடாகச் சென்று மேற்கொண்ட தீவிரப் பிரச்சாரம் ஆகியவை அவருக்குச் சாதகமாக மாறியுள்ளதாகத் தெரிகிறது.

அனுபவம் வாய்ந்த மாமியார் லீமா ரோஸ் தடுமாற, அரசியலுக்குப் புதியவரான மருமகன் ஆதவ் அர்ஜுனா ஜொலிப்பது, மார்ட்டின் குடும்பத்தின் அரசியல் வாரிசு யார் என்ற விவாதத்தை எழுப்பியுள்ளது. அதிமுக மற்றும் தவெக என இரு முக்கிய சக்திகளிலும் கால் பதிப்பதன் மூலம், எந்தப் பக்கம் காற்று வீசினாலும் தங்கள் குடும்ப அதிகாரம் குறையாமல் பார்த்துக் கொள்வதே இவர்களின் வியூகம் என்று விமர்சகர்கள் கருதினர். பணபலம் மட்டுமே வெற்றியைத் தீர்மானிக்காது என்ற பாடத்தை லால்குடி உணர்த்துமா அல்லது மருமகனின் அதிரடி அரசியலுக்கு வில்லிவாக்கம் மகுடம் சூட்டுமா என்பது இறுதிச் சுற்றுகளின் முடிவிலேயே முழுமையாகத் தெரியவரும்.