திருநெல்வேலி மாவட்டம் வண்ணார்பேட்டை சேர்ந்தவர் சிவகுமார். இவர் ஜங்ஷன் மீனாட்சிபுரத்தைச் சேர்ந்த சுப்பையா என்பவருடன் கடந்த 23ஆம் தேதி தனது மோட்டார் சைக்கிளில் சென்று கொண்டிருந்தார். அப்போது லாரன்ஸ் என்பவர் ஓட்டி வந்த கார் மோட்டார் சைக்கிள் மீது மோதிவிட்டு நிற்காமல் சென்றது. இந்த விபத்தில் படுகாயமடைந்த சுப்பையா மருத்துவமனையில் சிகிச்சை பலனின்றி உயிரிழந்தார். இதுகுறித்து வழக்குபதிவு செய்த போலீசார் லாரன்ஸை கைது செய்து விசாரித்த போது விபத்து நடந்த நேரம் அவர் குடிபோதையில் இருந்தது உறுதியானது.
அவரை போலீசார் நீதிமன்றத்தில் ஆஜர்ப்படுத்தி சிறையில் அடைத்தனர். குடிபோதையில் வாகனம் ஓட்டி விபத்தை ஏற்படுத்தினால் கொலை முயற்சி என்ற வழக்காக மாற்றி நடவடிக்கை எடுக்கப்படும். இந்த ஆண்டு இதுவரை குடிபோதையில் வாகனங்களை ஓட்டி விபத்தை ஏற்படுத்திய 8 வழக்குகள் கொலை வழக்காக மாற்றப்பட்டது. அதிகபட்சமாக இந்த குற்றத்திற்கு 10 ஆண்டுகள் ஜெயில் தண்டனை மற்றும் அபராதம் விதிக்கப்படலாம். எனவே மது போதையில் வாகனம் ஓட்டாமல் பொறுப்புடன் செயல்படுமாறு நெல்லை எஸ்பி சிலம்பரசன் கூறியுள்ளார்.