கேரள மாநிலம் பத்தனம்திட்டாவைச் சேர்ந்த 10 மாதக் குழந்தை ஆலின் ஷெரின் ஆபிரகாம், தனது மரணத்திலும் ஐந்து பேருக்கு மறுவாழ்வு அளித்து கேரளாவின் மிக இளைய உறுப்பு தானம் செய்தவர் என்ற நெகிழ்ச்சியான வரலாற்றைப் படைத்துள்ளார். கடந்த பிப்ரவரி 5-ஆம் தேதி, கோட்டயம் எம்.சி சாலையில் தனது தாய் மற்றும் தாத்தா பாட்டியுடன் காரில் சென்றபோது நேரிட்ட பயங்கர விபத்தில் ஆலின் படுகாயமடைந்தார். தீவிர சிகிச்சை அளிக்கப்பட்டும் பலனின்றி அந்தச் சிறுமிக்கு மூளைச் சாவு ஏற்பட்டதாக மருத்துவர்கள் அறிவித்தனர். அந்தப் பேரிழப்பின் இருண்ட சூழலிலும், மனிதாபிமானத்தின் உச்சமாகத் தங்கள் குழந்தையின் உறுப்புகளைத் தானம் செய்ய அந்தப் பெற்றோர் முன்வந்தது அனைவரையும் கண்கலங்க வைத்துள்ளது.
ஆலின் உயிரிழந்தாலும், அவரது உறுப்புகள் மூலம் ஐந்து நபர்களுக்குப் புதிய வாழ்க்கை கிடைத்துள்ளது. விபத்தில் சிக்கித் துடிதுடித்த அந்தப் பிஞ்சு உயிர், இன்று பிறர் உடலில் வாழ்ந்து கொண்டிருப்பது ஒரு தியாகத்தின் அடையாளமாகப் பார்க்கப்படுகிறது. தங்கள் குழந்தையின் இழப்பைத் தாங்கிக் கொள்ள முடியாத துயரத்திலும், மற்றுமொரு குடும்பத்தின் கண்ணீரைத் துடைக்க வேண்டும் என்ற அந்தப் பெற்றோரின் அசாதாரணக் கருணைக்கும், துணிச்சலுக்கும் கேரளா மட்டுமல்லாது ஒட்டுமொத்த தேசமே வீரவணக்கம் செலுத்தி வருகிறது. அந்தச் சிறு தேவதையின் ஆன்மா சாந்தியடையட்டும்.