தமிழகத்தில் 10 மற்றும் 12 ஆம் வகுப்பு பொதுத்தேர்வுகளுக்கான அட்டவணை இன்று வெளியாகின்றது. 2026 ஏப்ரல் மாதம் நடைபெற இருக்கும் 10, 12 ஆம் வகுப்பு பொது தேர்வுகளுக்கான அட்டவணையை இன்று காலை 10 மணிக்கு அமைச்சர் அன்பில் மகேஷ் வெளியிட உள்ளார். தமிழகத்தில் 10 முதல் 12 ஆம் வகுப்பு மாணவர்களுக்கு பொதுத்தேர்வு நடைபெற்று வந்த நிலையில் இந்த கல்வி ஆண்டு 11 ஆம் வகுப்பு பொது தேர்வு ரத்து செய்யப்படுவதாக தமிழக அரசு அறிவித்தது.
இதனைத் தொடர்ந்து நடப்பு கல்வி ஆண்டுக்கான 10, 12 ஆம் வகுப்பு பொதுத் தேர்வுக்கான அட்டவணை இன்று வெளியாகிறது. சென்னை கோட்டூர்புரம் அண்ணா நூற்றாண்டு நூலக அரங்கில் பள்ளிக்கல்வித்துறை அமைச்சர் அன்பில் மகேஷ் பொதுத்தேர்வுக்கான அட்டவணையை இன்று வெளியிடுகின்றார். அடுத்த ஆண்டு ஏப்ரல் மாதம் இறுதிக்குள் சட்டப்பேரவை தேர்தல் நடைபெற வாய்ப்புள்ளதால் கடந்த ஆண்டை விட முன்னதாகவே பொது தேர்வு தேதிகள் இருக்கும் என கூறப்படுகிறது. தேர்வு அட்டவணையை எதிர்நோக்கி பல லட்ச மாணவர்கள் மற்றும் பெற்றோர் ஆர்வமுடன் காத்திருக்கின்றனர்.