“டேய் என்னடா பண்ற… என் ஊருக்கு ரோடு போடுறீங்களா… இல்ல கீழே குதிக்கவா?… தண்ணீர்த் தொட்டி ஏறி மிரட்டிய இளைஞர்… லலன்பூரில் பரபரப்பு…!!”

இளைஞர்கள் பொதுவாகக் காதல் விவகாரங்கள் அல்லது சொந்தப் பிரச்னைகளுக்காகவே கோபுரங்கள் மற்றும் நீர்த்தேக்கங்கள் மீது ஏறிப் போராட்டம் நடத்துவதைக் கண்டிருக்கிறோம். ஆனால், உத்தரப்பிரதேச மாநிலம் மௌ மாவட்டம், மதுபன் அருகே உள்ள லலன்பூர் கிராமத்தைச் சேர்ந்த மித்ரா நிதின் பிரஜாபதி என்ற இளைஞர், முற்றிலும் பொது நலனுக்காக நீர்த்தேக்கத்தில் ஏறிப் போராட்டம் நடத்தி அனைவரின் கவனத்தையும் ஈர்த்துள்ளார்.

லலன்பூர் கிராமத்தில் பாசி மற்றும் பிரஜாபதி ஆகிய சமூக மக்கள் கணிசமாக வாழ்ந்து வருகின்றனர். இவர்களது குடியிருப்புப் பகுதியில் வெறும் 250 மீட்டர் தூரத்திற்கான சாலை வசதி பல ஆண்டுகளாக ஏற்படுத்தப்படவில்லை. இது குறித்து அப்பகுதி மக்கள் ஊராட்சி முதல் மாவட்ட நிர்வாகம் வரை பலமுறை அதிகாரிகளிடம் மனுக்கள் அளித்தும் எந்தவித நடவடிக்கையும் எடுக்கப்படவில்லை எனப் தெரிகிறது. இதனால் வேதனையடைந்த நிதின் பிரஜாபதி, அதிகாரிகளின் அலட்சியத்தைக் கண்டித்து இன்று காலை கிராமத்தில் உள்ள நீர்த்தேக்கத்தின் மீது ஏறி விசித்திரமான முறையில் தனது எதிர்ப்பைப் பதிவு செய்தார்.

தகவலறிந்து சம்பவ இடத்திற்கு விரைந்து வந்த காவல் துறையினர் மற்றும் வருவாய்த்துறை அதிகாரிகள், நீர்த்தேக்கத்தில் இருந்த இளைஞருடன் பேச்சுவார்த்தை நடத்தினர். சாலை அமைப்பதற்கான தகுந்த நடவடிக்கை விரைவில் எடுக்கப்படும் என அதிகாரிகள் உறுதியளித்ததைத் தொடர்ந்து, அவர் பாதுகாப்பாகக் கீழே இறங்கினார். இருப்பினும், அரசுப் பணியைத் தடுத்தல் மற்றும் பொதுமக்களுக்கு இடையூறு விளைவித்தல் ஆகிய பிரிவுகளின் கீழ் காவல் துறையினர் அவரை அதிரடியாகக் கைது செய்து விசாரணை நடத்தி வருகின்றனர்.