திக்.. திக்..! பேன்சி கடையில் பட்டப்பகல் பயங்கரம்… பெண்ணை குத்திவிட்டு இளைஞர் தற்கொலை முயற்சி… வெளிவந்த பகீர் பின்னணி…!!

ஈரோடு மாவட்டம் தாளவாடி அடுத்துள்ள ஓசூர் கிராமத்தைச் சேர்ந்த அஞ்சு என்ற பெண், கருத்து வேறுபாடு காரணமாக கணவரைப் பிரிந்து குழந்தைகளுடன் தாய் வீட்டில் வசித்து வருகிறார். வாழ்வாதாரத்திற்காக அப்பகுதியில் உள்ள ஒரு தனியார் பேன்சி கடையில் வேலை செய்து வரும் இவருக்கும், அதே ஊரைச் சேர்ந்த நிதி நிறுவன ஊழியரான நாகேந்திரனுக்கும் இடையே பழக்கம் இருந்துள்ளது. இருப்பினும், கடந்த சில நாட்களாக நாகேந்திரனுடன் பேசுவதை அஞ்சு தவிர்த்து வந்ததாகக் கூறப்படுகிறது. இதனால் ஆத்திரமடைந்த நாகேந்திரன், அஞ்சு வேலை பார்த்த கடைக்கே நேரில் சென்று வாக்குவாதம் செய்ததோடு, திடீரென தான் மறைத்து வைத்திருந்த கத்தியால் அவரைக் குத்திவிட்டு அங்கிருந்து தப்பிச் சென்றுள்ளார்.

கத்திக்குத்தால் படுகாயமடைந்து அலறிய அஞ்சுவை அக்கம் பக்கத்தினர் மீட்டு சிகிச்சைக்காக மருத்துவமனைக்கு அனுப்பி வைத்தனர். இந்நிலையில், தாக்குதல் நடத்திவிட்டுத் தப்பியோடிய நாகேந்திரனும் சிறிது நேரத்திலேயே விஷம் குடித்து தற்கொலைக்கு முயன்றுள்ளார். உடனடியாக பொதுமக்களால் மீட்கப்பட்ட அவரும் மருத்துவமனைக்குக் கொண்டு செல்லப்பட்டார். தற்போது இருவருக்கும் அரசு மருத்துவமனையில் தீவிர சிகிச்சை அளிக்கப்பட்டு வருகிறது. இச்சம்பவம் குறித்து வழக்குப்பதிவு செய்துள்ள தாளவாடி காவல்துறையினர், இந்தத் தாக்குதலுக்கான பின்னணி மற்றும் முழுமையான காரணங்கள் குறித்து தீவிரமாக விசாரணை மேற்கொண்டு வருகின்றனர். பட்டப்பகலில் நடந்த இந்த கத்திக்குத்து மற்றும் தற்கொலை முயற்சி சம்பவம் அப்பகுதியில் பெரும் அதிர்ச்சியையும் பரபரப்பையும் ஏற்படுத்தியுள்ளது.