‘இனி சும்மா விடமாட்டோம்’… சவுதிக்கு ஏமன் ஹவுதிகள் விடுத்த பகீர் வார்னிங்… வான்வெளியில் நடந்த நடுக்கடல் பரபரப்பு…!

ஏமனில் செயல்பட்டு வரும் ஈரானின் ஆதரவு பெற்ற ஹவுதி கிளர்ச்சியாளர்கள், சவுதி அரேபியாவிற்கு எதிராக கடுமையான போர்க்கால எச்சரிக்கையை விடுத்துள்ளனர். சவுதி அரேபியா தங்களின் வான்வெளிப் பரப்புக்குள் அத்துமீறி நுழைந்தால் மிக மோசமான விளைவுகளைச் சந்திக்க நேரிடும் என்றும், இனி அவர்களைச் சும்மா விடப்போவதில்லை என்றும் ஹவுதி அமைப்பு பகிரங்கமாக அறிவித்துள்ளது. இந்த எச்சரிக்கையானது மத்திய கிழக்கில் ஏற்கனவே நிலவி வரும் பதற்றத்தை மேலும் அதிகரிக்கச் செய்து, ஒரு புதிய பாதுகாப்புப் பிரச்சினையாக உருவெடுத்துள்ளது.

இந்த திடீர் மோதலுக்குக் காரணம், சமீபத்தில் ஏமனின் தலைநகர் சனாவில் உள்ள சர்வதேச விமான நிலையத்தில் தரையிறங்க முயன்ற ஈரான் நாட்டு விமானம் ஆகும். இஸ்ரேல் மற்றும் அமெரிக்கா நடத்திய போரினால் பாதிக்கப்பட்டு, ஈரானில் சிகிச்சை பெற்று வந்த சுமார் 200 பேரை ஏற்றி வந்த அந்த விமானத்தை, சவுதி அரேபியாவின் போர் விமானங்கள் ஏமன் வான்வெளிக்குள் நுழைந்து தடுக்க முயன்றன. சவுதியின் இந்தத் தடுப்பு முயற்சியை ஹவுதி படையினர் தங்களின் ராணுவ பலத்தால் முறியடித்ததாகக் கூறப்படுகிறது.

இச்சம்பவம் குறித்துப் பேசிய ஹவுதி அமைப்பின் அதிகாரப்பூர்வ செய்தி தொடர்பாளர் யாக்யா சாரி, “சவுதி அரேபியாவின் விமான நிலையங்கள் மட்டுமின்றி, நிலம் மற்றும் கடல் பகுதியில் உள்ள அந்த நாட்டிற்குச் சொந்தமான பிற முக்கியச் சொத்துகளையும் குறிவைத்து நாங்கள் தாக்குதல் நடத்துவோம்” என்று எச்சரித்துள்ளார். மேலும், சவுதி போர் விமானங்களின் தடைகளை மீறி அந்த ஈரான் விமானம் பத்திரமாகத் தரையிறங்கியதாகவும், தற்போது அது மீண்டும் ஈரான் தலைநகர் டெஹ்ரானை நோக்கிப் புறப்பட்டுச் சென்றுவிட்டதாகவும் அவர் உறுதிப்படுத்தியுள்ளார்.

ஈரானின் உயர்மட்டத் தலைவர் அயதுல்லா அலி கமேனியின் இறுதிச் சடங்கில் பங்கேற்கச் சென்ற ஏமன் நாட்டின் பிரதிநிதிகளை மீண்டும் அழைத்து வர அந்த விமானம் சென்றுள்ளதாகத் தெரிவிக்கப்பட்டுள்ளது. எத்தகைய இக்கட்டான சூழலையும் எதிர்கொள்ளத் தங்கள் நாட்டுப் போர்வீரர்கள் முழுத் தயாராக இருக்கிறார்கள் என்றும், சவுதியின் முற்றுகையைத் தகர்க்க வீரர்களின் விரல்கள் துப்பாக்கியின் திரிகரில் எப்போதும் தயாராக உள்ளதாகவும் ஹவுதி செய்தித் தொடர்பாளர் ஆக்ரோஷமாகத் தெரிவித்துள்ளார்.