“எக்ஸ்ட்ரா லக்கேஜ், ஏழரை சனி…. எல்லாமே ஒழிஞ்சது”…. கூட்டணிக் கட்சிகளை வச்சு செய்யும் ஆர்.எஸ். பாரதி! கொந்தளிக்கும் அரசியல் களம்….!

சேலம் திமுக கூட்டத்தில் அக்கட்சியின் அமைப்புச் செயலாளர் ஆர்.எஸ். பாரதி பேசிய பேச்சு தமிழக அரசியலில் தற்போது பெரும் பரபரப்பை ஏற்படுத்தியுள்ளது. கூட்டணி கட்சிகளைக் கடுமையாக விமர்சித்துள்ள அவர், தேர்தல் தோல்விகளுக்கும் தொகுதிப் பகிர்வு சிக்கல்களுக்கும் கூட்டணிக் கட்சிகளே காரணம் என்ற கோணத்தில் தனது கருத்துக்களைப் பதிவு செய்துள்ளார். குறிப்பாக, காங்கிரஸ் உள்ளிட்ட பழைய கூட்டாளிகளை மறைமுகமாகவும் நேரடியாகவும் விமர்சித்திருப்பது அரசியல் வட்டாரத்தில் சலசலப்பை ஏற்படுத்தியுள்ளது.

ஆர்.எஸ். பாரதியின் இந்த அதிரடிப் பேச்சுக்கு முக்கியக் காரணமாக, சமீபத்தில் நடந்து முடிந்த சட்டமன்றத் தேர்தலிலும் இடைத்தேர்தலிலும் திமுக சந்தித்த பின்னடைவுகள் பார்க்கப்படுகின்றன. தவெகவின் எழுச்சி மற்றும் திமுக கூட்டணியில் ஏற்பட்டுள்ள விரிசல்களுக்கு மத்தியில், கூட்டணிக் கட்சிகள் இல்லாத தனிக் களத்திலேயே திமுக கணிசமான வாக்கு வங்கியைப் பெற்றுள்ளதாகவும், இனி யாருடைய தயவும் தேவையில்லை என்றும் அவர் சுட்டிக்காட்டியுள்ளார்.

கூட்டணி குறித்துப் பேசுகையில், “எக்ஸ்ட்ரா லக்கேஜ்” மற்றும் “ஏழரை நாட்டு சனி” போன்ற கடுமையான வார்த்தைகளைப் பயன்படுத்தி கூட்டணிக் கட்சிகளின் பங்களிப்பைக் கேள்விக்குள்ளாக்கியுள்ளார் ஆர்.எஸ். பாரதி. கடந்த காலங்களில் கூட்டணிக் கட்சிகளுக்குக் கூடுதல் தொகுதிகள் ஒதுக்கியதால்தான் திமுக ஆட்சியை இழக்க நேரிட்டது என்றும், தற்போதைய சூழலில் கூட்டணிச் சுமை நீங்கியுள்ளதால் உள்ளாட்சித் தேர்தலை எதிர்கொள்ள கட்சித் தொண்டர்கள் உற்சாகத்துடன் தயாராக வேண்டும் என்றும் அவர் அழைப்பு விடுத்துள்ளார்.

இதற்கிடையே, தவெக அரசு மீது பல்வேறு ஊழல் குற்றச்சாட்டுகளையும் ஆர்.எஸ். பாரதி முன்வைத்துள்ளார். மின்சார கொள்முதல் டெண்டர் விவகாரம் மற்றும் பாமாயில், பருப்பு வாங்குவதில் முறைகேடுகள் நடந்துள்ளதாகக் குறிப்பிட்டுள்ள அவர், இதற்காக அரசுக்கு எதிராக திமுக கடுமையான போராட்டங்களை முன்னெடுக்கும் எனவும் எச்சரித்துள்ளார். திமுகவின் இந்த அதிரடி நிலைப்பாடு வரவிருக்கும் உள்ளாட்சித் தேர்தல்களில் அரசியல் களத்தை மேலும் சூடுபிடிக்கச் செய்யும் என எதிர்பார்க்கப்படுகிறது.