ஐயோ பாவம்… மழைநீர் பள்ளத்தில் விழுந்த பெண் பரிதாப பலி…. பழிபோடும் அதிகாரிகளின் பகீர் அலட்சியம்… நெஞ்சை பதறவைக்கும் சம்பவம்…!

சென்னை அண்ணா நகர் டவர் மெட்ரோ ரயில் நிலையம் அருகே ஞாயிற்றுக்கிழமை இரவு, மழைநீர் வடிகால் பணிக்காக தோண்டப்பட்டு மூடப்படாமல் இருந்த ஒரு அடி ஆழமுள்ள பள்ளத்தில் விழுந்து கலாவதி (59) என்ற தூய்மைப் பணியாளர் பரிதாபமாக உயிரிழந்தார். அண்ணா நகரில் உள்ள ஒரு இனிப்பகத்தில் வேலை பார்த்து வந்த இவர், வேலை முடிந்து தேவாலயத்திற்குச் செல்லும் வழியில் மழைநீர் நிரம்பியிருந்த அந்தப் பள்ளத்தில் தவறி விழுந்துள்ளார். மின்கசிவு காரணமாக அவர் இறந்திருக்கலாம் என சந்தேகிக்கும் காவல் துறையினர், இது தொடர்பாக வழக்குப் பதிவு செய்து பிரேதப் பரிசோதனை அறிக்கைக்காகக் காத்திருக்கின்றனர்.

பள்ளத்தில் விழுந்த கலாவதி, அதிலிருந்து வெளியே வர முடியாமல் தண்ணீரில் சிறிது நேரம் போராடியுள்ளார். தண்ணீரில் மின்சாரம் பாய்ந்திருக்கலாம் என சந்தேகித்த பொதுமக்கள், அவரைக் காப்பாற்ற முற்படாமல் உடனடியாக காவல் துறைக்குத் தகவல் தெரிவித்தனர். சம்பவ இடத்திற்கு வந்த காவல் துறையினர் பொதுமக்களின் உதவியுடன் அவரை மீட்டனர். எனினும், ஆம்புலன்ஸ் மருத்துவக்குழுவினர் அவர் ஏற்கெனவே இறந்துவிட்டதாக உறுதிப்படுத்தியதை அடுத்து, அவரது உடல் கீழ்ப்பாக்கம் அரசு மருத்துவமனைக்கு பிரேதப் பரிசோதனைக்காக அனுப்பி வைக்கப்பட்டது.

இச்சம்பவம் குறித்து மின்வாரிய அதிகாரிகள் ஆய்வு செய்ததில், விபத்து நடந்த நேரத்தில் அங்கு எந்த மின்கசிவும் இல்லை எனத் தெரிவித்தனர். அதேசமயம், இந்த உயிரிழப்புக்கு தாங்கள் பொறுப்பல்ல என்றும், அப்பெண்ணுக்கு மின்சாரம் தாக்கியதற்கான அறிகுறிகள் இருந்ததாகவும் சென்னை மாநகராட்சி அதிகாரிகள் கூறியுள்ளனர். இருப்பினும், விபத்து நடந்த திங்கள்கிழமை அதிகாலையிலேயே மாநகராட்சி ஊழியர்கள் அந்தப் பள்ளத்தை கான்கிரீட் மற்றும் குப்பைகளைக் கொண்டு மூடினர். இதற்கிடையில், அப்பகுதியில் வெளியே தெரிந்த மின் வயர்களை சீரமைக்கும் பணியில் மின்வாரிய அதிகாரிகள் ஈடுபட்டுள்ளனர்.