“பழைய ஓய்வூதியம் திரும்புமா?… 8-வது ஊதியக் குழுவுக்கு பறந்த முக்கிய கடிதம்… அரசு ஊழியர்களுக்கு காத்திருக்கும் மெகா அப்டேட்”…!!

மத்திய அரசு ஊழியர்களின் நீண்டகால எதிர்பார்ப்பான 8ஆவது ஊதியக் குழுவின் செயல்பாடுகள் சூடுபிடிக்கத் தொடங்கியுள்ளன. இது தொடர்பாக, தேசியக் குழுவின் (JCM) செயலாளர் சிவ கோபால் மிஸ்ரா, ஊதியக் குழுவின் உறுப்பினர் செயலாளர் பங்கஜ் ஜெயினுக்கு விரிவான கடிதம் ஒன்றை அனுப்பியுள்ளார். அதில், ஊழியர்களின் பிரதான கோரிக்கையான பழைய ஓய்வூதியத் திட்டத்தை (OPS) மீண்டும் அமல்படுத்த வேண்டும் என்பதை மிக அழுத்தமாகப் பதிவு செய்துள்ளார். பங்களிப்பு ஓய்வூதியத் திட்டங்களான NPS மற்றும் UPS ஆகியவற்றில் ஊழியர்களுக்குப் பல்வேறு நடைமுறைச் சிக்கல்கள் இருப்பதாகவும், சமூகப் பாதுகாப்பை உறுதி செய்யும் வகையில் பழைய ஓய்வூதிய முறையே சிறந்தது என்றும் அந்தக் கடிதத்தில் சுட்டிக்காட்டப்பட்டுள்ளது.

பெண் ஊழியர்களின் நலன் சார்ந்த விவகாரங்களில் இந்த முறை கூடுதல் கவனம் செலுத்தப்பட்டுள்ளது. குறிப்பாக, 8ஆவது ஊதியக் குழுவின் கட்டமைப்பிற்குள் பெண்களுக்கெனத் தனிப் பிரிவு உருவாக்கப்பட வேண்டும் என்ற கோரிக்கை முன்வைக்கப்பட்டுள்ளது. மகப்பேறு நலன்கள், குழந்தை பராமரிப்பு விடுப்பு (CCL) ஆகியவற்றோடு, மாதவிடாய் விடுப்பு மற்றும் பணியிடப் பாதுகாப்பு போன்ற முக்கியமான அம்சங்களை முறையாக ஆய்வு செய்து கொள்கைகளை வகுக்க வேண்டும் என JCM வலியுறுத்தியுள்ளது. இதன் மூலம் அரசுப் பணிகளில் பெண்களுக்கான சமத்துவமும், அவர்களின் தனிப்பட்ட தேவைகளுக்கான அங்கீகாரமும் கிடைக்கும் என எதிர்பார்க்கப்படுகிறது.

நிர்வாக ரீதியான மாற்றங்களைப் பொறுத்தவரை, கோரிக்கை மனுக்களைச் சமர்ப்பிக்கும் முறையில் உள்ள தொழில்நுட்பத் தடைகளை நீக்க வேண்டும் என்று ஊழியர் தரப்பு கோரியுள்ளது. இணையதளத்தில் உள்ள 500 வார்த்தை வரம்பை 1,000 ஆகவும், கோப்பு அளவை 10 MB ஆகவும் அதிகரிக்கக் கோரிக்கை விடுக்கப்பட்டுள்ளது. மேலும், அனைத்து ஊழியர்களும் தங்கள் கருத்துக்களைப் பதிவு செய்ய ஏதுவாக மின்னஞ்சல் மற்றும் அச்சுப் பிரதிகள் மூலமும் மனுக்களை ஏற்க வலியுறுத்தப்பட்டுள்ளது. பல்வேறு தொழிற்சங்கங்களுடன் ஆலோசிக்க கால அவகாசம் தேவைப்படுவதால், இதற்கான காலக்கெடுவை மே 31 வரை நீட்டிக்கவும், ஏப்ரல் 13-க்குப் பிறகு நேருக்கு நேர் சந்திப்பு நடத்தவும் JCM விருப்பம் தெரிவித்துள்ளது.