“மதுபோதையில் வெறிச்செயல்: மனைவியை தூணில் சங்கிலியால் கட்டிப்போட்டு தாக்குதல்…! நெஞ்சை பதறவைக்கும் மத்தியப் பிரதேச கொடூரம்…!”

மத்தியப் பிரதேச மாநிலம் ராஜ்கர் மாவட்டத்தில் உள்ள சிபிபுரா கிராமத்தில், கணவனால் ஒரு பெண் கொடூரமான முறையில் சித்திரவதை செய்யப்பட்ட அதிர்ச்சி சம்பவம் அரங்கேறியுள்ளது. கடந்த ஜூன் 10 அன்று, மங்கிபாய் தன்வர் (30) என்ற பெண்மணி சமைத்து வைத்திருந்தபோது, அவரது கணவர் சர்தார் சிங் தன்வர் மதுபோதையில் வீட்டிற்கு வந்துள்ளார். எந்த காரணமும் இன்றி மனைவியிடம் தகராறு செய்த அவர், தடியாலும் கைகளாலும் அவரை கொடூரமாக தாக்கியுள்ளார். இந்தத் தாக்குதலைப் பொறுக்க முடியாமல், காவல் நிலையத்தில் புகார் அளிக்க அந்தப் பெண் நள்ளிரவில் காடுகள் மற்றும் வயல்வெளிகள் வழியாக 6 கிலோமீட்டர் தூரம் நடந்து சென்றுள்ளார்.

ஆனால், காவல் நிலையத்தை அடைவதற்கு முன்பாகவே வழியில் அந்தப் பெண்ணை கணவன் கண்டுபிடித்து, மீண்டும் தாக்கி வலுக்கட்டாயமாக வீட்டிற்கு இழுத்துச் சென்றுள்ளார். வீட்டிற்கு வந்ததும், “இனி எப்படி காவல் நிலையத்திற்குச் சென்று என் மீது புகார் அளிக்கிறாய் என்று பார்க்கிறேன்” எனக் கூறி, மனைவியின் கழுத்தில் இரும்புச் சங்கிலியைப் போட்டு வீட்டின் தூணோடு பூட்டியுள்ளார். அத்துடன் நிற்காமல், கேஸ் அடுப்பில் இரும்பு கம்பியை பழுக்கக் காய்ச்சி, பெண்ணின் இடுப்பு மற்றும் தொடைப் பகுதிகளில் கொடூரமாகச் சுட்டுத் தீய்த்துள்ளார். சுமார் 24 மணி நேரம் சங்கிலியால் பிணைக்கப்பட்டு, வெளியில் சொல்ல முடியாத சித்திரவதைகளை அந்தப் பெண் அனுபவித்துள்ளார்.

பின்னர், கிராமப் பஞ்சாயத்தைக் கூட்டி மனைவியை மிரட்டி எழுதிக் வாங்க கணவன் வெளியே சென்ற சமயத்தில், மங்கிபாய் அங்கிருந்த ஒரு கல்லை எடுத்து சங்கிலியின் பூட்டை உடைத்து தப்பியோடியுள்ளார். கழுத்தில் சங்கிலி மற்றும் பூட்டுடன் 6 கிலோமீட்டர் தூரம் நடந்து அவர் கில்சிப்பூர் காவல் நிலையத்தை அடைந்தபோது, மக்கள் அதிர்ச்சியடைந்தனர். காவல்துறையினர் உடனடியாக அவரது கழுத்தில் இருந்த சங்கிலியை அகற்றி, மருத்துவப் பரிசோதனைக்கு உட்படுத்தினர். அவரது உடலில் காயங்கள் மற்றும் தீக்காயங்கள் இருப்பது உறுதி செய்யப்பட்டதை அடுத்து, தலைமறைவாக இருந்த கணவர் சர்தார் சிங்கை காவல்துறையினர் கைது செய்து சிறையில் அடைத்தனர்.