“தேர்தல் வந்தா மட்டும் ‘ரூட்’ மாறுதா?… ஆட்டோ ஓட்டி, துணி துவைத்து, சைக்கிள் ஓட்டி… பிரச்சாரத்துல இன்னும் என்னலாம் பண்ணுவீங்க?

தமிழக சட்டமன்றத் தேர்தல் களம் தற்போது உச்சக்கட்டப் பிரச்சாரத்தால் அனல் பறந்து வருகிறது. திருவெறும்பூர் தொகுதியில் போட்டியிடும் பள்ளிக் கல்வித்துறை அமைச்சர் அன்பில் மகேஸ் பொய்யாமொழி, ஆட்டோ ஓட்டி வாக்கு சேகரித்த புகைப்படம் சமூக வலைதளங்களில் விவாதமாகியுள்ளது. இதே பாணியில் செய்யாறு திமுக வேட்பாளர் ஜோதி சிமெண்ட் கிராதி செய்தும், அரவக்குறிச்சி வேட்பாளர் இளங்கோவன் குழந்தைகளுக்கு ஐஸ் வாங்கிக் கொடுத்தும் தங்களின் ஆதரவைத் திரட்டி வருகின்றனர்.

வேட்பாளர்கள் மக்களின் கவனத்தை ஈர்க்கப் பல்வேறு வினோதமான உத்திகளைக் கையாண்டு வருகின்றனர். லால்குடி சுயேச்சை வேட்பாளர் மன்சூர் அலி கான் துணி துவைத்துக் கொடுத்தும், திருப்பத்தூர் தவெக வேட்பாளர் காய்கறி விற்றும் வாக்கு சேகரிக்கின்றனர். டீ ஆற்றுவது, வடை சுடுவது, பூ கட்டுவது எனப் பல வேட்பாளர்கள் சாமானியர்களோடு ஒருவராகத் தங்களைக் காட்டிக்கொள்ளப் பெரும் முயற்சி எடுத்து வருகின்றனர்.

முக்கியத் தலைவர்களும் இந்தப் பிரச்சார யுத்தத்தில் பின்தங்கவில்லை. தமிழக முதல்வர் ஸ்டாலின் மெட்ரோ ரயிலில் பயணம் செய்து பொதுமக்களைச் சந்திக்க, தவெக தலைவர் விஜய் காரைக்குடியில் சைக்கிள் ஓட்டி தனது ‘விசில்’ சின்னத்திற்குத் தீவிரமாக வாக்கு சேகரித்தார். ஏப்ரல் 23-ஆம் தேதி தேர்தல் நடைபெற உள்ள நிலையில், திமுக, அதிமுக, நாம் தமிழர் மற்றும் தவெக ஆகிய நான்கு தரப்பிற்கும் இடையே கடுமையான போட்டி நிலவி வருகிறது.

தேர்தல் நெருங்கும் வேளையில் வேட்பாளர்கள் காட்டும் இந்த அதீத அக்கறை குறித்து மக்கள் மத்தியில் விமர்சனங்களும் எழுந்துள்ளன. தேர்தல் காலங்களில் மட்டும் வீடு தேடி வந்து “சுத்திச் சுத்தி” வரும் வேட்பாளர்கள், வெற்றி பெற்றுப் பதவியேற்ற பிறகு தங்களைக் கண்டு கொள்வதில்லை என்பதே வாக்காளர்களின் பொதுவான அங்கலாய்ப்பாக உள்ளது. வெயிலின் தாக்கத்தையும் தாண்டி, வாக்குறுதிகளும் வினோதப் பிரச்சாரங்களும் தமிழகத் தேர்தல் களத்தைத் தகிப்படையச் செய்துள்ளன.