“எங்களை நம்பி இனி இருக்காதீங்க” உங்க தேவையை நீங்களே பாத்துக்கோங்க… உலகநாடுகளின் அடிமடியில் கைவைத்த டிரம்ப்..!!

மத்திய கிழக்கு நாடுகளில் போர் தீவிரமடைந்து வரும் நிலையில், அமெரிக்க அதிபர் டொனால்ட் டிரம்ப் உலக நாடுகளுக்கு விடுத்துள்ள அதிரடி எச்சரிக்கை பெரும் பரபரப்பை ஏற்படுத்தியுள்ளது. இந்தப் போரில் அமெரிக்காவிற்குத் துணை நிற்காத நாடுகளுக்கு தாங்களும் இனி உதவப் போவதில்லை என்று டிரம்ப் திட்டவட்டமாகத் தெரிவித்துள்ளார். “எங்களை நம்பி இருக்காதீர்கள், உங்கள் தேவைகளை நீங்களே கவனித்துக் கொள்ளுங்கள்” என்ற தொனியில் அவர் பேசியுள்ளது உலக அரங்கில் விவாதத்தை கிளப்பியுள்ளது.

குறிப்பாக, கச்சா எண்ணெய் போக்குவரத்திற்கு மிக முக்கியமான ஹார்முஸ் ஜலசந்தியை (Strait of Hormuz) பாதுகாப்பதில் இருந்து அமெரிக்கா பின்வாங்கக்கூடும் என்று அவர் சமிஞ்சை காட்டியுள்ளார். இந்தப் பாதையைச் சார்ந்துள்ள நாடுகளே அதன் பாதுகாப்பிற்குப் பொறுப்பேற்க வேண்டும் என்றும், கச்சா எண்ணெய் தேவையைப் பூர்த்தி செய்ய சம்பந்தப்பட்ட நாடுகளே உரிய நடவடிக்கை எடுக்க வேண்டும் என்றும் அவர் வலியுறுத்தியுள்ளார். இதுவரை உலக நாடுகளுக்குப் பாதுகாப்பு அளித்து வந்த அமெரிக்காவின் இந்த மனமாற்றம் உலகப் பொருளாதாரத்தில் பெரும் தாக்கத்தை ஏற்படுத்தும் என அஞ்சப்படுகிறது.

அமெரிக்காவின் இந்த முடிவுக்கு பிரிட்டன், பிரான்ஸ் உள்ளிட்ட சில நட்பு நாடுகள் அதிருப்தி தெரிவித்துள்ளன. எனினும், தனது ‘அமெரிக்காவே முதன்மை’ (America First) என்ற கொள்கையில் உறுதியாக இருக்கும் டிரம்ப், போரில் பங்கெடுக்காத நாடுகளுக்கு இனி ராணுவ ரீதியாகவும், பொருளாதார ரீதியாகவும் எந்தவிதமான சலுகைகளும் வழங்கப்படாது என்பதைத் தெளிவுபடுத்தியுள்ளார். இது சர்வதேச உறவுகளில் புதிய சிக்கல்களைத் தோற்றுவிக்கும் என்று அரசியல் வல்லுநர்கள் கணித்துள்ளனர்.